9 დეკემბრის ღამეს, დაახლოებით 2:00 საათისთვის 9 აპრილის ბაღთან (ყოფილი ალექსანდროვის ბაღი) აქციის მონაწილე 2 პირი — ლაშა გოგებაშვილი და გოჩა წერუაშვილი დააკავეს. ამის შესახებ NEWS.On.ge-სთან დაკავებულების მეგობარმა ნინო გიკაშვილმა განაცხადა. მისი თქმით, ისინი აქციიდან მოდიოდნენ, სახლში აპირებდნენ წასვლას, როცა ორმა ნიღბიანმა მისი მეგობრები დააკავა.

"ალექსანდროვის სკვერთან ვიყავით, მანქანა გვყავდა გაჩერებული, უკვე მოვდიოდით აქციიდან, ვიშლებოდით, მოგვადგა თეთრი შკოდა ნიღბიანებით, არ იყო პატრულის ეკიპაჟი და ორი ბიჭი — ლაშა გოგებაშვილი და გოჩა წერუაშვილი ჩასვეს მანქანაში და წაიყვანეს. მძღოლი და ერთი მეგობარი დაგვტოვეს, თქვენ არ გვჭირდებითო და წავიდნენ. ჩვენ და მანქანას ფოტოები გადაუღეს. ცხელ ხაზზე დავრეკეთ, არავის აქვს ინფორმაცია სად არიან გადაყვანილი დაკავებულები", — ამბობს ნინო გიკაშვილი NEWS.On.ge-სთან.

მოგვიანებით ლაშა გოგებაშვილის ოჯახის წევრმა ტვ პირველთან საუბრისას განაცხადა, რომ ის პარლამენტის წინ მდგარი ნაძვის ხის დაზიანების გამო დააკავეს. რუსთაველის გამზირზე მიტანილ რკინის კონსტრუქციაზე ლაშა გოგებაშვილმა მხოლოდ ევროკავშირის დროშა დაკიდა. მათივე თქმით, ლაშა იაკობ გოგებაშვილის შთამომავალია.

"გუშინ ავიდა და დროშას უკეთებდა ნაძვის ხეს. ამ დროს ჩამოეკიდა ტოტს, ხელი მოკიდა და აბრალებენ ტოტის მოტეხვას და ახლა თქვენ წარმოგიდგენიათ? იტყვიან, მილიონი ღირს ეს ნაძვის ხე, ტოტი მოტეხა მილიონს და გაუშვებენ 9-წლიანზე უდანაშაულო ადამიანს, რომელსაც საერთოდ არასდროს არაფერი დაუშავებია. თუ ვიყავი გაბრაზებული, ახლა ვარ გამწარებული და ამას არ ვაპატიებთ, უფრო მეტნი გამოვალთ. არ არსებობს! ლაშა გოგებაშვილს რამდენი ხელიც დაერტყმება, იმდენს არ ვაპატიებ, არ არსებობს! ის არის იაკობის შთამომავალი. გოგებაშვილებს იჭერენ, ილია ჭავჭავაძის შთამომავლებს იჭერენ, მსახიობებს იჭერენ", — ამბობს ოჯახის წევრი.