ერთიანი ნაციონალური მოძრაობის ოფისის ჩხრეკის დროს პარტიის ახალგაზრდული ორგანიზაციის 5 წევრი დააკავეს. ინფორმაციას ამის შესახებ პარტია ავრცელებს.

ენმ-ის ახალგაზრდული ფრთის ბროსეს ქუჩაზე მდებარე ოფისში პოლიცია ჩხრეკაზე დაახლოებით 16:00 საათისთვის შევიდა.

შსს-ს თანამშრომლებმა ადგილზე მისულ ნაციონალური მოძრაობის წევრს, სოფო ჯაფარიძეს განუცხადეს, რომ სასამართლო განჩინების საფუძველზე, შენობაში საგამოძიებო მოქმედებები მიმდინარეობს, რის გამოც მას ოფისში ვერ შეუშვებდნენ.

ერთიანი ნაციონალური მოძრაობის ახალგაზრდული ფრთის წევრი, ბექა პაპაშვილი სოციალურ ქსელში წერს, რომ უწყების თანამშრომლებმა ენმ-ს ახალგაზრდულ ოფისში მოლოტოვის კოქტეილები ჩაუდეს.

აღნიშნულ ფაქტზე ასევე სოციალურ ქსელში აქვეყნებს პოსტს ენმ-ს ახალგაზრდული ორგანიზაციის კიდევ ერთი წევრი, ტიტე გედენიძე.

ჩვენ თვალწინ შეალაგეს ჩანთებით და ჩვენს ოფისში დააწყვეს მოლოტივები. ჩაგვიდეს და გვტენიან. ეს აღარ ჯდება აღარაფერში, გარდა რუსული მმართველობისა. — წერს გედენიძე.