პარლამენტთან საპროტესტო აქცია მიმდინარეობს. ამის მიუხედავად, იქ მყოფი ადამიანების ნაწილმა გადაწყვეტილება მიიღო, რომ საზოგადოებრივი მაუწყებლის შენობასთან გადაენაცვლა.

პროტესტის მონაწილეების მეორე ნაწილი ისევ რუსთაველის გამზირზე რჩება და "ქართული ოცნების" მიერ 2028 წლამდე ევროკავშირთან მოლაპარაკების შეჩერებას აპროტესტებს.

ამის პარალელურად, უკვე მეორე დღეა, საზოგადოებრივ მაუწყებელთან ხალხი იკრიბება, მათ შორის ჟურნალისტები, რომლებიც საეთერო დროის დათმობას ითხოვენ. მათი განცხადებით, ქვეყნის ბიუჯეტის დაფინანსებული ტელევიზია საქართველოში მიმდინარე პროცესებს და სპეცრაზმელების მიერ მოქალაქეებზე ძალადობას ობიექტურად არ აშუქებს.

აქციის მონაწილეები პირველი არხის დირექტორის, თინათინ ბერძენიშვილის, და სამეურვეო საბჭოს თავმჯდომარის, ვასილ მაღლაფერიძის, გადადგომას ითხოვენ. შეგახსენებთ, რომ გუშინ, 30 ნოემბერს, თინათინ ბერძენიშვილი საინიციატივო ჯგუფს ეთერის დათმობაზე დასთანხმდა. შედეგად, მოქალაქეებს საშუალება მიეცათ, რომ საზოგადოებისთვის ხმა მიეწვდინათ და მათთვის გაეზიარებინათ ის კრიტიკული მოსაზრებები, რომლებსაც, მათი თქმით, პირველი არხი არ აშუქებს.