შემოდგომაზე, თურქეთში ახალი სასწავლო წლის დაწყების შემდეგ, მოსწავლეებს ევოლუციის შესახებ გაკვეთილების მომზადება აღარ მოუწევთ და არც დარვინის თეორიას შეისწავლიან. ინიციატივა მთავრობას ეკუთვნის.

ივლისის თვეში გამართულ პრესკონფერენციაზე, თურქეთის განათლების მინისტრმა განაცხდა, რომ შემოდგომიდან ახალი წიგნები შევა ყველა სკოლაში და ისინი საბოლოოდ შეწყვეტენ ევოლუციის შესწავლას.

"ევოლუციური ბიოლოგიის სწავლება საუნივერსიტეტო დონეზე სჯობს... ეს ის თეორიაა, რომელიც უფრო მეტ ფილოსოფიას მოითხოვს, ვიდრე ეს სკოლის მოსწავლეებს აქვთ", - აღნიშნა მან.

გამოცემა NPR წერს, რომ თურქეთის ხელისუფლება აკეთებს იმას, რასაც ღირებულებებზე დაფუძნებულ სასწავლო პროგრამას უწოდებენ. კრიტიკოსები თურქეთის პრეზიდენტს, რეჯეფ თაიფ ერდოღანს, ახალგაზრდების განათლების ხარჯზე უფრო კონსერვატიული და რელიგიური იდეოლოგიის წინ წამოწევაში ადანაშაულებენ. თურქეთის ახალი პოლიტიკის წინააღმდეგ პროფკავშირებისა და ბიოლოგების ასოციაციაც გამოდის:

"ევოლუცია - სატესტო მაგალითია. საუბარია რაციონალურობაზე. იმაზე, რომ უნდა აიგოს თუ არა სასწავლო პროგრამა იმაზე, თუ რა მიაჩნია ხელისუფლებას სწორ ღირებულებებად".

NPR წერს, რომ სტამბოლში მშობლები ამ ცვლილებების გამო შეშფოთებას გამოთქვამენ, მათი აზრით, ახალი სასწავლო პოლიტიკით, მათი შვილები სხვა ქვეყნების განათლების დონეს ჩამორჩებიან. თურქეთში ამერიკელი ემიგრანტი, ამბობს, რომ, ახალი სასწავლო გეგმის გამო, ოჯახმა ქვეყნის დატოვება გადაწყვიტა.

კრიტიკის მიუხედავად, პრეზიდენტის ამ ინიციატივას მოსახლეობას შორის ბევრი მხარდამჭერიც ჰყავს. NPR-ის ინფორმაციით, სტამბოლის ერთ-ერთი რაიონის მაცხოვრებელი ამბობს, რომ მან თავისი შვილი სკოლის გარეშე დატოვა იმის, გამო რომ სასწავლო კლასებში გოგოებს თავსაბურავების ტარება ეკრძალებოდათ. ეს კანონი 2014 წელს გაუქმდა:

"სკოლებში გვასწავლიდნენ, რომ ადამიანი მაიმუნის ევოლუციის შედეგად წარმოიშვა, მაგრამ ეს ასე არაა... მე მხარს ვუჭერ ჩვენს მთავრობას, რადგანაც სასწავლო პროგრამიდან მის ამოღებას გეგმავს. მგონია, რომ ეს ეშმაკის შექმნილია".

თურქეთი გახდება მეორე ქვეყანა, საუდიის არაბეთის შემდეგ, რომელმაც სასკოლო პროგრამიდან დარვინის ევოლუციის თეორია ამოიღო.