აფხაზეთში მოქმედი 6 ბანკი აპროტესტებს რუსული საინვესტიციო პროექტების შესახებ ე.წ. შეთანხმებას, რომელიც დე-ფაქტო პარლამენტში იხილება და რომელიც აფხაზეთში რუსული ბანკების ფილიალების შექმნას გულისხმობს, — ამის შესახებ აფხაზეთის უმაღლესი საბჭოს თავმჯდომარემ, ჯემალ გამახარიამ დღეს ბრიფინგზე განაცხადა.

მისი თქმით, დოკუმენტის მოწინააღმდეგეები ამტკიცებენ, რომ "ეს არის კაბალური, დამამცირებელი და კოლონიალური სახის შეთანხმება, რომელიც მათთვის დამღუპველია და უარს ამბობენ".

ჯემალ გახარიას კომენტარს ინტერპრესნიუსი ავრცელებს:

„რუსული ბანკები ქმნიან თავიანთ ფილიალებს და მთელი ანგარიშსწორება, ფინანსური ოპერაციები, რაც უზარმაზარ მშენებლობებთანაა დაკავშირებული, აფხაზეთის გვერდის ავლით ხორციელდება. არავითარი გადასახადი აფხაზეთის ბიუჯეტში არ შედის. ამ უზარმაზარი თანხის შემოსვლასთან და ხარჯვასთან აფხაზეთის ბანკებს კავშირი არ აქვთ. ამასთან დაკავშირებით ბანკების პროტესტი — 6 ბანკი აპროტესტებს ამ დოკუმენტს.

ამ დოკუმენტის მე-9 მუხლის მე-2 პუნქტშია გაწერილი საკითხები, როგორ ხდება დაფინანსება. ბანკებისთვის ძალიან დიდი შემოსავალია, როდესაც ათეულ ასობით მილიარდ რუბლზეა საუბარი. ფილიალზეა საუბარი, ესეც მნიშვნელოვანია - ბანკი რომ შემოვიდეს, ადგილზე გადასახადი უნდა იხადოს. ფილიალი როდესაც შემოდის, რუსული კანონმდებლობის საფუძველზე ფუნქციონირებს და არა ადგილობრივი კანონმდებლობის. შესაბამისად, გადასახადს უხდის თავის სათავო ორგანიზაციას და არა აფხაზეთის ბიუჯეტს. არა მარტო მშენებლობის პროცესში, არამედ მშენებლობის დამთავრების მერეც 8 წლის განმავლობაში ისინი არანაირ გადასახადს აფხაზეთში არ იხდიან. 8 წლის შემდეგ ვის გადაუხდიან, ეს აქ არ წერია. სავსებით დასაბუთებულად ვარაუდობენ, რომ ეს გადასახადი 8 წლის შემდეგაც რუსეთში წავა. რუსული მხარე ამბობს, თუ ასე არ გავაკეთებთ, არ მაქვს გარანტია, რომ ჩემი ინვესტიციები დაცული იქნება. აფხაზები ეუბნებიან, გვაქვს ადრე მიღებული კანონი უცხოური ინვესტიციების დაცვის შესახებ; რუსები კი ეუბნებიან: კი ბატონო, კანონი გაქვთ, მაგრამ რაც აქამდე ინვესტიციები შემოგვიტანია, დაცული არაა. ბევრი შემთხვევაა ბიზნესმენების გაძარცვის, ბიზნესის წართმევის და ა.შ. ამიტომ, მსგავსი შემთხვევების თავიდან ასაცილებლად, ჩვენი ბანკების ფილიალების მეშვეობით უნდა განვახორციელოთ ეს ოპერაციები. აფხაზები ამბობენ: თქვენი ბანკების მეშვეობით თუ განხორციელდება, ჩვენ არ გვაქვს გარანტია, რომ ეს ფული კიდევ სხვა რაღაცებზე არ დაიხარჯება და ეს ყოველივე კორუფციის საგანი არ გახდება. აფხაზური მხარე ამბობს, რომ ამით აუცილებლად გაკოტრდება ეს ბანკები. რადგანაც საქმე ძირითადად ტურისტულ ბიზნესს ეხება, იქ დასაქმებული აფხაზებიც გაკოტრდებიან. აფხაზეთი ვერაფერს მიიღებენ მილიარდიანი ინვესტიციებიდან. ამასთან, ამ შეთანხმების მიხედვით, მუშახელი რუსებს ჩამოჰყავთ. ამბობენ, რომ აფხაზეთში კვალიფიციური მუშახელი არაა. ე.ი. ასიათასიან ქონებას შეიძენენ, რამდენი ათასი მუშა უნდა შემოიყვანონ და აფხაზების ადგილი არ რჩება აფხაზეთში. ეს არის ყველაფერი იმის მიზეზი, რატომაა ასეთი ხმაური ატეხილი აფხაზეთში.

მოწინააღმდეგეები ამტკიცებენ, რომ ეს არის კაბალური, დამამცირებელი, შეთანხმება. კოლონიალური სახის შეთანხმება, რომელიც დამღუპველია და უარს ამბობენ", — განაცხადა გამახარიამ.