ზუგდიდში ოპოზიციურად განწყობილი ადამიანების პირადობის მოწმობების ჩამორთმევის მცდელობაში ერთიანობა-ნაციონალური მოძრაობის წევრი, ანა წითლაძე, კიდევ რამდენიმე ადამიანს ამხელს.

"ქართული ოცნება ზუგდიდსა და მთელ სამეგრელოში ტოტალურად ცდილობს პირადობის მოწმობების ამოღებას იმ ადამიანებისგან, რომლებიც ერთიანობა-ნაციონალური მოძრაობის ამომრჩევლები არიან. დღეს მე ამ ადამიანებს დავასახელებ: სოფელ ოქტომბერში, აფხაზეთის პოლიციის მაღალჩინოსანი და ბიძინა ივანიშვილის ძმის, ადიკო ივანიშვილის ნათლული, ზაალ გეგეჭკორი; სოფელ ოქტომბრის რწმუნებული, პავლე გეგეჭკორი; ქართული ოცნების აქტივისტები, ცოლ-ქმარი, ასმათ უბილავა და დავით ქირია, რომლებიც სოფელ ოქტომბერში ერთიანობა-ნაციონალური მოძრაობის ამომრჩეველს მიუვარდნენ და მათგან პირადობის მოწმობების ამოღებას ცდილობდნენ. ამ ადამიანმა და ადგილობრივმა მოსახლეობამ მათ პირადობები არ მისცეს, რის შემდეგაც ზაალ გეგეჭკორი მათ დაემუქრა და უთხრა, რომ პასუხს აგებდნენ და მათ გაუსწორდებოდა იმის გამო, რომ პირადობის მოწმობები არ გადასცეს.

ასევე, ვასახელებ: სოფელ რიყის რწმუნებულს, გიორგი ჯოჯუას, რომელიც პირადობის მოწმობების ამოღებას ცდილობს იმ ადგილობრივებისგან, ვისზეც იცის, რომ ოპოზიციურად განწყობილია. გარდა ამისა, ის კერძო სექტორში მომუშავე ადამიანებს ემუქრება იმით, რომ თუ ისინი ხმას ქართულ ოცნებას არ მისცემენ ან მათ პირადობის მოწმობებებს არ გადასცემენ, სამსახურს დაატოვებინებს", – თქვა წითლიძემ.

წითლაძის მტკიცებით, მას აქვს დამადასტურებელი აუდიო ჩანაწერები, მათ შორის სხვა მტკიცებულებებიც, თუ როგორ ცდილობენ მის მიერ ჩამოთვლილი ადამიანები მოქალაქეებისთვის პირადობის მოწმობების ჩამორთმევას. მისივე თქმით, მტკიცებულებებს საერთაშორისო სადამკვირვებლო მისიებს გადასცემენ.