დღეს, 7 ოქტომბერს, სატელეფონო საუბარი შედგა სალომე ზურაბიშვილსა და მოლდოვის პრეზიდენტს, მაია სანდუს შორის, სადაც ამ უკანასკნელმა განაცხადა, რომ "მოლდოვა მტკიცედ დგას ქართველი ხალხის გვერდით დემოკრატიისა და ევროპული ინტეგრაციისკენ სწრაფვაში".

მოლდოვაში საპრეზიდენტო არჩევნები 20 ოქტომბერს ჩატარდება. ამავდროულად, ჩატარდება რეფერენდუმი, სადაც ხალხი გადაწყვეტს, სურთ თუ არა, რომ მოლდოვა ევროკავშირის წევრი გახდეს და მასთან უფრო მჭიდრო კავშირები დაამყაროს.

მოლდოვის არჩევნებზე კენჭს იყრის მოქმედი პრო-დასავლელი პრეზიდენტი მაია სანდუ და მისი მტავარი კონკურენტი, ყოფილი მთავარი პროკურორი ალექსანდრ სტოიანოგლოა. წინასწარი მონაცემებით, სანდუ მას 25%-ით უსწრებს.

პირველ და მეორე ადგილზე გასულთა ტური იმ შემთხვევაში გაიმართება, თუ პირველ ტურში ვერც ერთი კანდიდატი ვერ მოიპოვებს 50%-ზე მეტ ხმას.

მოლდოვა მრავალი წლის განმავლობაში იყო რუსეთის გავლენის ქვეშ, თუმცა ეს 2020 წლის არჩევნების შემდეგ შეიცვალა, როდესაც პრორუსი იგორ დოდონი მაია სანდუმ შეცვალა. პრორუსული ძალები ქვეყნის რუსეთისკენ მოქცევის მოტივით კვლავაც მოქმედებენ.