ფინანსთა სამინისტრო უარყოფს ბრიტანული არხის Sky News-ის განცხადებას რუსეთიდან შემოსული სანქცირებული მანქანების შემოყვანასთან დაკავშირებით.

ფინანსთა სამინისტროს შემოსავლების სამსახური ბრიტანული ტელეკომპანია Sky News-ის მიერ მომზადებულ მასალის მტკიცებებს უარყოფს იმის თაობაზე, რომ, უკრაინაში ომის გამო დაწესებული სანქციების მიუხედავად, ძვირადღირებული ავტომობილები მაინც ხვდება რუსეთში.

სამინისტროს განცხადებაში წერია, რომ სიუჟეტის გადაღების პერიოდში, საქართველოში იმყოფებოდა ბრიტანელი ჟურნალისტი და სანქციების აღსრულებასთან დაკავშირებით ოფიციალური განმარტების მისაღებად ფინანსთა სამინისტროს არ დაჰკავშირებია.

სამინისტრო წერს, რომ იმავე ტელეარხმა მიმდინარე წლის თებერვლის რეპორტაჟიც ფაქტების გადამოწმების გარეშე მოამზადა.

"საქართველო სრულად და მტკიცედ იცავს საერთაშორისო სანქციების აღსრულების პროცედურებს და არ არსებობს ამის საპირისპირო დამადასტურებელი არცერთი ფაქტი", — წერს სამინისტრო.

მათი ინფორმაციით, საქართველოს ტერიტორიაზე არსებული საქონლის გადაადგილების თაობაზე, სამინისტროს მუდმივი კომუნიკაცია აქვს აშშ-სა და ევროკავშირის კომპეტენტურ უწყებებთან და მუდმივად ხდება მათი ინფორმირება.

"საერთაშორისო სანქციების დაწესების დღიდან, საქართველო სრულად იცავს დადგენილ წესებს და საზღვარზე მკაცრ მონიტორინგს უწევს ყველა ტიპის საბაჟო ოპერაციას", — ნათქვამია განცხადებაში.

მათი განმარტებით, შეზღუდვები არ ეხება:

  • აშშ-დან და ევროკავშირიდან შემოყვანილი ავტომობილების ექსპორტს/რეექსპორტს იმ ქვეყნებში, რომლებიც არიან მითითებული აშშ-სა და ევროკავშირის მიერ გამოქვეყნებულ სანქციებში.

  • მსუბუქ ავტომობილებს, რომლებიც ფიზიკური პირის პირად საკუთრებაში, გამოიყენება პირადი სარგებლობისთვის და არ არის განკუთვნილი გასაყიდად.


მათი თქმით, არც ერთი ამ ქვეყნის სანქციების რეგულაციით არ იკრძალება მოწინავე ტექნოლოგიური ან მაღალპრიორიტეტული საქონლის, მსუბუქი ავტომობილების მესამე ქვეყნის დანიშნულებით, მათ შორის რუსეთი ფედერაციის გავლით ტრანზიტული გაგზავნა, ამიტომ საქართველო ცალმხრივად ვერ აკრძალავს ექსპორტის ტრანზიტის პროცედურებს.

"[ამის] შესაბამისად, საქართველო ცალმხრივად ვერ აკრძალავს ექსპორტის/რეექსპორტის/ტრანზიტის პროცედურებს იმ საქონელთან მიმართებით, რომელიც სანქციების რეგულაციების მიხედვით არ ვრცელდება აკრძალვები/შეზღუდვები. აღნიშნულიდან გამომდინარე, მათი გადაადგილების შეზღუდვა ჩვენი მხრიდან ვერ განხორციელდებოდა.

ამასთან, შემოსავლების სამსახურის საბაჟო დეპარტამენტი პარტნიორ უწყებებთან ერთად, მკაცრ კონტროლს ახორციელებს ტრანზიტული ნომრის მქონე ავტომობილებზე და დეტალურად ეცნობა წარდგენილ სათანადო დოკუმენტაციას

სრული პასუხისმგებლობით შეგვიძლია განვაცხადოთ, არ არსებობს არცერთი ფაქტი, იმისა, რომ გაერთიანებული სამეფოდან წამოსული სანქცირებული მსუბუქი ავტომობილი, საქართველოს გავლით ტრანზიტის, ექსპორტის ან რეექსპორტის რეჟიმით გაიგზავნა რუსეთის ფედერაციის დანიშნულებით", — წერია განცხადებაში.

ცნობისთვის, 24 სექტემბერს, ბრიტანულმა ტელევიზია Sky News-მა საგამოძიებო სიუჟეტი გამოაქვეყნა, რომლის მიხედვითაც, დასავლეთის სანქციების მიუხედავად, ძვირადღირებული ავტომობილების რუსეთში იმპორტირება საქართველოს გავლით ხდებოდა.

გაიგეთ მეტი ამ თემაზე:

Sky News: სანქციების მიუხედავად ევროპული მანქანები რუსეთში საქართველოდანაც გადაჰყავთ