რუსეთის საგარეო საქმეთა სამინისტროს ოფიციალურმა წარმომადგენელმა, მარია ზახაროვამ, განაცხადა, რომ რუსეთს "ბიურგენსტოკის პროცესის" ჩარჩოს შეხვედრებში მონაწილეობა არ მიუღია და არც აპირებს, რადგან მხარეები რუსეთის ფედერაციის ინტერესებს არ ითვალისწინებენ.

ზახაროვას კომენტარი ვოლოდიმირ ზელენსკის განცხადებას მოჰყვა, რომელმაც 20 სექტემბერს ევროკომისიის პრეზიდენტ ურსულა ფონ დერ ლაიენთან ერთობლივ პრესკონფერენციაზე, რუსეთის თანამონაწილეობით, 2024 წელს მეორე სამშვიდობო სამიტის ორგანიზების მნიშვნელობას გაუსვა ხაზი.

"რუსეთის წარმომადგენლებს "ბიურგენსტოკის პროცესის" ჩარჩოს არც ერთ შეხვედრაში მიუღიათ მონაწილეობა და არც მიიღებენ. ამ პროცესს კონფლიქტის მოგვარებასთან კავშირი არ აქვს. ეს ანგლო-საქსებისა და მათი უკრაინელი მარიონეტების სიყალბის კიდევ ერთი მანიფესტაციაა. ე.წ მეორე სამიტს ის მიზანი აქვს, რომ აბსოლუტურად შეუსაბამო "ზელენსკის ფორმულა" კონფლიქტის მოგვარების უალტერნატივო გზად გაასაღოს, მოიპოვოს მსოფლიოს უმრავლესობის მხარდაჭერა და რუსეთს დანებების ულტიმატუმი წაუყენოს", — განაცხადა მარია ზახაროვამ

რუსეთის ფედერაციის საგარეო საქმეთა სამინისტროს წარმომადგენელმა კურსკის ოპერაციაზეც ისაუბრა და უკრაინული მხარე ტერორიზმში დაადანაშაულა.

"კიევსა და დასავლეთში მშვიდობაზე არ ფიქრობენ. მათ ომი სჭირდებათ. ამას კურსკის რეგიონში უკრაინის შეიარაღებული ძალების ბანდიტური შეჭრა და ზელენსკის მიერ რუსეთის სიღრმეში NATO-ს შორი დისტანციის იარაღების გამოყენების ნებართვის გაცემაც ადასტურებს. ეს განგრძობითი ტერაქტია ჩვენი ქვეყნის მოსახლეობის წინააღმდეგ. ჩვენ ტერორისტებს არ დაველაპარაკებით", — აღნიშნა ზახაროვამ