20 აგვისტოს ქართული ოცნების პოლიტსაბჭომ მორიგი განცხადება გაავრცელა, სადაცხ საუბარი კვლავ ნაცმოძრაობის გასამართლებასა და ამ პარტიის ანტიკონსტიტუციურ ძალად გამოცხადებას შეეხებოდა.

ოცნების პოლიტსაბჭო იმავე განცხადებაში ბევრისთვის მოულოდნელად გამოეხმაურა "სარალიძის საქმის" მოსამართლეს, რომელმაც საქმე პირველ ინსტანციაში განიხილა.

ოცნება არეშიძის გადაწყვეტილებას საეჭვოს უწოდებს და გამოთქვამს ვარაუდს, რომ მოსამართლის მიერ მიღებულმა გადაწყვეტილებამ "რევოლუციური სცენარის" გაღვივებას შეუწყო ხელი.

განცხადებაში აღნიშნულია ისიც, რომ ეკა არეშიძე დღემდე განსაკუთებული პრივილეგიებით სარგებლობს "უცხოელებისგან" და ეს გარემოება გამოთქმულ ეჭვებს, კიდევ უფრო აღრმავებს.

ოცნების ამ განცხადებას, დღეს, 21 აგვისტოს, FACEBOOK პოსტით გამოეხმაურა მოსამართლე ეკა არეშიძე. მან ხაზგასმით აღნიშნა, რომ არავის აქვს უფლება მოსთხოვოს მოსამართლეს ანგარიში კონკრეტულ საქმეზე და ბათილია ყველა აქტი, რომელიც ზღუდავს მოსამართლის დამოუკიდებლობას.

"ვეხმაურები გავრცელებული განცხადების მხოლოდ კონკრეტულ მონაკვეთს, რომელიც უშუალოდ მე შემეხო. თავის მართლება იმ აბსურდულ ბრალდებებზე, რაც აღნიშულ განცხადებაში გაჟღედა უბრალოდ დამამცირებელი და ღირსების შემლახავია. მხოლოდ რამდენიმე წინადადებით შემოვიფარგლები.
შეგახსენებთ:
1. საქართველოს კონსტიტუცია მუხლი 63.
მოსამართლე
მოსამართლე თავის საქმიანობაში დამოუკიდებელია და ემორჩილება მხოლოდ კონსტიტუციასა და კანონს. რაიმე ზემოქმედება მოსამართლეზე ან ჩარევა მის საქმიანობაში გადაწყვეტილების მიღებაზე ზეგავლენის მიზნით აკრძალულია და ისჯება კანონით. არავის აქვს უფლება მოსთხოვოს მოსამართლეს ანგარიში კონკრეტულ საქმეზე. ბათილია ყველა აქტი, რომელიც ზღუდავს მოსამართლის დამოუკიდებლობას.
2. აღნიშნულ საქმეზე, 6 წლის წინ, სპეციალურად შექმნილი პარლამენტის დროებითი საგამოძიებო კომისიის მიერ მიღებულია შესაბამისი დასკვნა.
3. სასამართლო არ არის ვალდებული გაიზიაროს პროკურატურის მიერ წარდგენილი ბრალდება ან დაცვის მხარის პოზიცია.
4. სასამართლოს განაჩენი ყველასთვის გასაგები და მისაღები ვერ იქნება.
5. უსამართლობის განცდა იწვევს საზოგადოების აღშფოთებას.
ორი უდანაშაულო არასრულწლოვნის მკვლელობის თემით სპეკულირება, ნებისმიერი მხრიდან, ნებისმიერ დროს, უზნეობაა!
P.S. ამ ტიპის საჯარო განცხადება გამოძიების დაწყების საფუძველია." — წერს, მოსამართლე ეკა არეშიძე