"დავსხდეთ მოლაპარაკების მაგიდასთან და დავასრულოთ ეს ჩხუბი", — ამის შესახებ ბელარუსის პრეზიდენტმა რუსეთის ტელევიზიისთვის მიცემულ ინტერვიუში განაცხადა.

ლუკაშენკოს თქმით, ომის გაგრძელებით მხოლოდ დასავლეთში არიან დაინტერესებულები და სურთ, რომ რუსეთმა და უკრაინამ ერთმანეთი გაანადგურონ, რუსეთსა და ბელარუსს კი ნატოს წინააღმდეგ ომი არ უნდათ.

"ეს არის რუსეთისა და ბელარუსის საერთო ბრძოლა ამ მხეცების წინააღმდეგ. რა ვქნათ, ვისხდეთ და ველოდოთ როგორ გაანადგურებენ ჩვენს ქვეყანას, როგორც ეს 85 წლის წინ გააკეთეს? რა თქმა უნდა, ვუპასუხებთ მყისიერად და ადეკვატურად. თუ არ უნდათ, რომ ეს მოხდეს, დავსხდეთ მოლაპარაკებების მაგიდასთან და დავასრულოთ ეს ბრძოლა. ეს არც უკრაინელ ხალხს სჭირდება, არც რუსებს და არც ბელარუსებს. ეს დასავლეთში აწყობთ.

მე არ შემიძლია ფაქტების გამჟღავნება, რადგანაც ისინი გასაიდუმლოებულია, თუმცა ზოგჯერ ისინი ღიად საუბრობენ — მაღალი რანგის პირები ამბობენ: "დაე რუსებმა და უკრაინელებმა დახოცონ ერთმანეთი და ყველა დაიღუპოს", — განაცხადა ლუკაშენკომ.

შეგახსენებთ, რუსეთში საბრძოლო მოქმედებები 6 აგვისტოდან მიმდინარეობს. ამ დროისთვის, უკრაინის მხარე რუსეთში 82 დასახლებულ პუნქტს აკონტროლებს, რაც დაახლოებით 1150 კვადრატული კილომეტრია.