თურქეთის პრეზიდენტმა, რეჯეფ თაიფ ერდოღანმა განაცხადა, რომ თურქეთი, შესაძლოა, შევიდეს ისრაელში, როგორც ლიბიისა და მთიანი ყარაბაღის შემთხვევაში გააკეთა, თუმცა არ დაუკონკრეტებია, თუ რა სახის ინტერვენციას გულისხმობდა.

"ჩვენ უნდა ვიყოთ ძალიან ძლიერები, რათა ისრაელმა ვერ შეძლოს მსგავსი რაღაცების გაკეთება პალესტინის წინააღმდეგ. როგორც შევედით ყარაბაღში, როგორც შევედით ლიბიაში, შესაძლოა, ასეთივე რამ გავუკეთოთ მათაც", — თქვა ერდოღანმა მმართველი პარტიის შეხვედრაზე, თავის მშობლიურ ქალაქ რიზეში.

"არ არსებობს მიზეზი, რის გამოც ჩვენ არ შეგვიძლია ამის გაკეთება... ჩვენ უნდა ვიყოთ ძლიერები, რათა შევძლოთ ამ ნაბიჯების გადადგმა“, — აღნიშნა მან.

მმართველი პარტიის წარმომადგენლებმა მედიას არ განუმარტეს, თუ კონკრეტულად რას გულისხმობდა ერდოღანის განცხადება.

2020 წელს თურქეთმა სამხედრო პერსონალი გაგზავნა ლიბიაში, გაეროს მიერ აღიარებული ლიბიის ეროვნული თანხმობის მთავრობის მხარდასაჭერად.

თურქეთი მხარს უჭერს ლიბიის პრემიერ მინისტრს, აბდულჰამიდ ალ-დბეიბას, რომელიც ტრიპოლის ეროვნული ერთიანობის მთავრობას ხელმძღვანელობს.

თურქეთმა უარყო პირდაპირი მონაწილეობა აზერბაიჯანის სამხედრო ოპერაციებში, მთიან ყარაბაღში, თუმცა გასულ წელს განაცხადა, რომ იგი იყენებს "ყველა საშუალებას", მათ შორის, სამხედრო წვრთნასა და მოდერნიზაციას, რათა მხარი დაუჭიროს თავის ახლო მოკავშირეს.