ადამიანის უფლებათა დაცვის კომიტეტის თავმჯდომარემ, ეკა ბესელიამ რუსთავი 2-ის საქმეზე დღეს მიღებულ გადაწყვეტილებასთან დაკავშირებით კომპანიის გენერალურ დირექტორს, ნიკა გვარამიას უთანაგრძო:

"გვარამიას მდგომარეობა იმდენად აღარ ექვემდებარება კონტროლს, რომ ის ფიქრობს, რომ ისეთ მდგომარეობაში ჩავვარდით მე ან თეა წულუკიანი, რომ უკაცრავად და, ტუალეტებიდან გვიწევს სატელეფონო საუბრების განხორციელება. თუ ეს არის ნიკა გვარამიას ფანტაზიის არეალი, დღეს მე მას გულწრფელად ვუსამძიმრებ".

ბესელიამ განაცხადა, რომ გვარამია შესაძლოა თვითონ აკეთებდეს ან წარსულში გაუკეთებია მსგავსი ქმედება, სწორედ ამიტომ წარმოუდგენია ახლა, რომ ბესელია ან წულუკიანი რუსთავი 2-ის საქმესთან დაკავშირებით ტუალეტებიდან ელაპარაკებიან მოსამართლეებს:

"ეს კანონი ჩვენ მივიღეთ სასამართლოს გაძლიერებისთვის, იმისთვის, რომ არც ნიკა გვარამიამ და არც ნაცმოძრაობამ არ ჩათვალონ, რომ საკონსტიტუციო სასამართლო არის მათი ქვემდგომი, საქვეუწყებო ფილიალი ამიტომ მივიღეთ, რომ თავი დავანებოთ საკონსტიტუციო სასამართლოში ხელებისა და სხვა რაღაცების ფათურს და მივცეთ საშუალება სასამართლოს იმუშაოს ნორმალურად".

ბესელიამ ასევე განაცხადა, რომ ის სასამართლოს ვერ მიუთითებს, რა გადაწყვეტილება უნდა მიიღოს მან. მისი თქმით, ნებისმიერი სასამართლოს გადაწყვეტილების დროს ერთი მხარე ყოველთვის უკმაყოფილო რჩება ხოლმე:

"თუ საქმე არ სრულდება მორიგებით, ეს არის აბსოლუტურად ნორმალური, რომ როცა მეორე მხარე უკმაყოფილოა გადაწყვეტილებით, ასეთ შემთხვევაში არის შემდეგი ეტაპი: ეს არის კიდევ ერთი ინსტანცია, რომელიც არსებობს საქართველოში - უზენაესი სასამართლო. ეს ყველაფერი მიუთითებს იმაზე, რომ ხელისუფლების ინტერესშია თქვენი ტელეკომპანიის მენეჯმენტი, თქვენი კომპანიის სტრატეგია, ოპოზიციური განმწყობა არ იყოს რაიმე ფორმით ხელშეშლილი და თუ ამისთვის რაიმე ტიპის გარანტიები იყო საჭირო და, პირველ რიგში, ფინანსურ გარანტიებზე საუბრობდა ბიძინა ივანიშვილი, მან თქვა, რომ მზად იყო ამ ნაბიჯის გადასადგმელად".

თბილისის სააპელაციო სასამართლომ დღეს, 10 ივნისს, ძალაში დატოვა საქალაქო სასამართლოს მოსამართლის, თამაზ ურთმელიძის გადაწყვეტილება რუსთავი 2-ის წილების ქიბარ ხალვაშისთვის მიკუთვნებასთან დაკავშირებით.

თბილისის სააპელაციო სასამართლომ რუსთავი 2-ის საქმის განხილვა 7 ივნისს დაასრულა.