პარასკევს საღამოს, აზერბაიჯანმა განაცხადა, რომ სომხეთმა მათი სამხედრო პოზიციების მიმართულებით, ხუთშაბათის შემდეგ, სამჯერ გაისროლა. სომხეთმა, პასუხად, სამი განცხადება გაავრცელა, სადაც აზერბაიჯანი დეზინფორმაციის გავრცელებაში დაადანაშაულა.

პარასკევს, ევროკავშირის სადამკვირვებლო მისიამ სომხეთში, ასევე, განაცხადა, რომ მათ დამკვირვებლებს "არ შეუნიშნავთ უჩვეულო გადაადგილება, ან რაიმე ინციდენტი“. მათ განაცხადეს, რომ აგრძელებენ ყოველდღიურ პატრულირებას საზღვრის სომხურ მხარეს.

აზერბაიჯანს დაშავებულებისა და დაღუპულების შესახებ ინფორმაცია არ გაუვრცელებია, თუმცა, აზერბაიჯანის პროკურატურამ განაცხადა, რომ ისინი იძიებდნენ ჯარისკაცის გარდაცვალებას, რომლის ცხედარი საზღვრის მახლობლად იპოვეს.

ჯარისკაცის გაუჩინარებ შესახებ, სომხეთმა განაცხადა, რომ მათ არ ჰქონდათ არანაირი მტკიცებულება და ცნობა იმის შესახებ, რომ მათი საზღვარი რომელიმე აზერბაიჯანელმა ჯარისკაცმა გადაკვეთა.

აზერბაიჯანის ბრალდებები გავრცელდა სომხეთში აშშ-ის სახელმწიფო მდივნის თანაშემწის, ჯეიმს ო'ბრაიენის ვიზიტიდან რამდენიმე დღის შემდეგ.

მაშინ, როცა სომხეთი და აზერბაიჯანი ერთმანეთს რეგულარულად ადანაშაულებენ სასაზღვრო შეტაკების წამოწყებაში, აზერბაიჯანის ბრალდებები პირველი იყო მას შემდეგ, რაც ორი ქვეყანა საერთო ჩრდილოეთ საზღვრის დელიმიტაციაზე შეთანხმდა.

ბოლოს ბრალდებები სასაზღვრო შეტაკებების შესახებ აპრილში, ერევნის, ვაშინგტონისა და ბრიუსელის სამმხრივი შეხვედრის წინ გაისმა.

იმ დროს, ბაქომ ღიად გამოხატა უკმაყოფილება შეხვედრის მიმართ და დასავლეთი სომხეთის მიმართ მიკერძოებულობაში დაადანაშაულა.

აზერბაიჯანის ბრალდებები მოჰყვა სომხეთის პრემიერ-მინისტრის, ნიკოლ ფაშინიანის განცხადებებს, სადაც მან ხაზი გაუსვა, რომ სომხეთის კონსტიტუციაში ცვლილებები არ შეიძლება იყოს აზერბაიჯანთან სამშვიდობო მოლაპარაკების ნაწილი.

ფაშინიანმა, ასევე, თქვა, რომ აზერბაიჯანთან სამშვიდობო შეთანხმების პროექტი "სრულად შემუშავებულია" და "მზადაა დასასრულებლად და ხელმოსაწერად".

მან უპასუხა აზერბაიჯანის პრეზიდენტის ილჰამ ალიევის განცხადებებს იმის შესახებ, რომ სამშვიდობო ხელშეკრულება სომხეთის ამჟამინდელი კონსტიტუციით "შეუძლებელი“ იქნებოდა.

აზერბაიჯანი ადრეც აკრიტიკებდა სომხეთის კონსტიტუციას "აზერბაიჯანის მიმართ ტერიტორიული პრეტენზიების“ გამო, სომხეთის დამოუკიდებლობის დეკლარაციის მოტივით, სომხეთის საბჭოთა სოციალისტური რესპუბლიკისა და ყარაბაღის საბჭოს ერთობლივი გადაწყვეტილებით "სომხეთის სსრ-ისა და ყარაბაღის მთიანი რეგიონის გაერთიანების შესახებ“.

ოთხშაბათს პრემიერ-მინისტრმა არ გამორიცხა, რომ სომხეთმა და აზერბაიჯანმა სამშვიდობო ხელშეკრულების ხელმოწერამდე დაიწყონ სატრანსპორტო კავშირების გახსნის საკითხზე მსჯელობა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.