მოკლედ: თბილისის მერის, კახა კალაძის თქმით, სანქციებზე არ ნერვიულობს და არც ამერიკის შეერთებულ შტატებში წასვლის სურვილი აქვს.

  • "არანაირი შეტყობინება არ მომსვლია. აშშ-ს ვიზა არ მაქვს. ბოლოს ამერიკაში ვიყავი, როდესაც "მილანში“ ვთამაშობდი. მას შემდეგ, არ ვყოფილვარ და არც მაქვს სურვილი წასვლის. ღმერთს ვთხოვ, რომ ამაზე მეტი სანერვიულო არ მომცეს ცხოვრებაში", — განაცხადა კალაძემ დღეს, 7 ივნისს, მედიასთან კომენტარში.

დეტალები: კალაძის თქმით, სანქციების არავის ეშინია და მისთვის "წარმოუდგენელი, არასერიოზული და ღიმილისმომგვრელია" სანქციებზე საუბარი:

  • "ამიხსნან ერთი მიზეზი, რატომ შეიძლება მმართველი გუნდი იყოს სანქცირებული, რაში გამოიხატება ევროინტეგრაციისთვის ძირის გამოთხრა? ან რომელი ადამიანების უფლებები დაირღვა 2012 წლიდან დღემდე?"

კონტექსტი: გუშინ 6 ივნისს, აშშ-ს სახელმწიფო დეპარტამენტმა საქართველოში რუსული კანონის მხარდაჭერისთვის სანქციების პირველი პაკეტი გამოაცხადა.

  • სანქცია გულისხმობს სავიზო შეზღუდვებს და ის შეეხება "ქართული ოცნების" და პარლამენტის წევრებს, ასევე, ძალოვნებს და კერძო პირებს.