მოკლედ: კრემლის პროპაგანდისტული გამოცემის, რიას თანახმად, რუსეთის პრეზიდენტის პრესმდივანმა, დმიტრი პესკოვმა, განაცხადა, რომ კრემლი ხედავს საქართველოს ხელისუფლების სურვილს, აღკვეთოს შიდა საქმეებში ჩარევა, რადგან ისინი ხედავენ ამის მცდელობებს.

პესკოვი: "ჩვენ, ერთი მხრივ, ვადასტურებთ საქართველოს მმართველი ხელისუფლების მტკიცე სურვილს, დააზღვიონ ქვეყანა საშინაო საქმეებში აშკარა ჩარევისგან, ფაქტობრივად, ისევე, როგორც ამას აკეთებს მსოფლიოს ქვეყნების დიდი უმრავლესობა.

  • მეორე მხრივ, ვხედავთ საქართველოს შიდა საქმეებში გარედან დაუფარავ ჩარევას და გვესმის საქართველოს წინააღმდეგ სანქციების დაწესების მუქარაც იმ შემთხვევაში, თუ ისინი მიიღებენ ამა თუ იმ კანონს. აბა, რა არის ეს, თუ არა პირდაპირი ჩარევა საქართველოს საქმეებში", — თქვა ვლადიმირ პუტინის პრესმდივანმა.

კონტექსტი: ამავე გზავნილებით ცდილობს საქართველოს ხელისუფლება, დაარწმუნოს საქართველოს მოქალაქეები რუსული კანონპროექტის მიღების "აუცილებლობაში". ხელისუფლების მაღალჩინოსნები ღიად აკეთებენ ანტიდასავლურ განცხადებებს და ამბობენ, რომ ქვეყნის შიდა საქმეებში ჩარევა "გლობალური ომის პარტიის" მიზანია და ამაში ისინი დასავლეთ მოიაზრებენ. გლობალური ომის პარტია არარსებული, გამოგონილი თეორიაა, რომელსაც რუსეთშიც დასავლეთის მარგინალიზების მიზნით ახსენებენ ხოლმე.

  • დმიტრი პესკოვმა აქამდეც არაერთხელ გამოუცხადა საქართველოს მთავრობას მხარდაჭერა კანონპროექტის საკითხში.

ამ წუთებში საქართველოს პარლამენტში, რუსული კანონის მესამე მოსმენა მიმდინარეობს პლენარულ სხდომაზე. იქ სიტყვიერი და ფიზიკური დაპირისპირება მოხდა. ოპოზიციის მიმართ, უმრავლესობის დეპუტატებმა უხამს ლექსიკასა და ჩხუბს მიმართეს.