NDI-ის კვლევის მიხედვით, მოსახლეობის 57 პროცენტი მიიჩნევს, რომ ნარკოტიკული საშუალებების პირადი მოხმარების გამო ციხის სასჯელი მიუღებელია. მოსახლოების მესამედზე მეტი, 36 პროცენტი კი ფიქრობს, რომ სასჯელის ეს ზომა მისაღებია. კითხვაზე "არ ვიცი" პასუხი გამოკითხულთა შვიდმა პროცენტმა გასცა.

იგივე მონაცემების ასაკობრივ ჭრილში განხილვისას ჩანს, რომ პროცენტულად ყველაზე დიდი წილი (65%) ციხის სასჯელს მიუღებლად 18-35 წლის ასაკობრივი ჯგუფი მიიჩნევს, სასჯელის ამ ფორმის მომხრე კი ყველაზე მეტი წილი (41%) 56 წლისა და ზემოთ ასაკობრივ კატეგორიაში მოხვედრილი ადამიანები არიან.

რაც შეეხება იმავე კითხვაზე პასუხებს დასახლების ტიპების მიხედვით. ნარკოტიკული საშუალებებისთვის სასჯელად ციხის გამოყენების ყველაზე დიდი წილი (62%) ეთნიკური უმცირესობებით დასახლებულ რეგიონებში გამოკითხული ადამიანები არიან. ამ სასჯელს მიუღებლად გამოკითხულთა ყველაზე დიდი წილი (69%) კი თბილისში მიიჩნევს.

კვლევა დიდი ბრიტანეთის მთავრობის, UK aid-ის ფინანსური ხელშეწყობით ჩატარდა, გამოკითხვას კი CRRC-საქართველო ატარებდა. კვლევის საველე სამუშაოები 18 ივნისი-9 ივლისის პერიოდში, საქართველოს მასშტაბით (ოკუპირებული ტერიტორიების გამოკლებით) შესრულდა. 2 261 პირი, პირისპირ ინტერვიუს სახით, წარმომადგენლობითი შერჩევით გამოიკითხა.