რა ხდება: ირაკლი კობახიძე უნგრეთშია, ის კონსერვატიული პოლიტიკური მოქმედების კონფერენციაზე სიტყვითაც გამოვიდა.

  • საქართველოს პრემიერ-მინისტრი გამოსვლითა და მისი პოლიტიკით აღფრთოვანებას არ მალავს უნგრეთის პრემიერ-მინისტრი ვიქტორ ორბანი.

რა თქვა ირაკლი კობახიძემ: "ბოლო პერიოდში განვითარებული და მოსალოდნელი გლობალური პროცესები გვიჩვენებს, რომ კიდევ უფრო გასაძლიერებელია ძალისხმევა ჩვენი მრავალსაუკუნოვანი ტრადიციებისა და ეროვნული იდენტობის დასაცავად".

  • ისაუბრა სამ მთავარ საყრდენზე, რაზეც ქართული იდენტობა დგას — ენა, მამული და სარწმუნოება. ამ კონტექსტში ახსენა საბჭოთა ხელისუფლების მიერ ქართულისთვის მშობლიური ენის სტატუსის გაუქმების მცდელობაც, რომლის საშუალებაც მას ქართველმა ხალხმა არ მისცა.
  • თუმცა, მისი აზრით, დღეს მთავარი საშიშროება, მაინც დასავლეთიდან მოდის:
  • "დღეს ე.წ. ლიბერალები აყენებენ რისკის ქვეშ ქვეყნებისა და ერების იდენტობას მთელი მსოფლიოს მასშტაბით. ამგვარი რისკების წინაშე ყველაზე მეტად ევროპა და ამერიკის შეერთებული შტატები დგანან, სადაც ე.წ. ლიბერალურ იდეოლოგიას ყველაზე ფართოდ აქვს ფესვები გადგმული“.

ამის მიუხედავად, კობახიძე ამბობს, რომ საქართველო წარმატებით ახერხებს ტრადიციული ღირებულებების დაცვას. პრემიერ-მინისტრის თქმით, სწორედ ამ გამოწვევებზე საპასუხოდ დააინიციირეს საკონსტიტუციო ცვლილებები ლგბტ პროპაგანდის წინააღმდეგ.

  • "გვაქვს დიდი იმედი, რომ აღნიშნული საკანონმდებლო ცვლილებები ე.წ. ლიბერალურ იდეოლოგიას წარმატებით დაუპირისპირდება და ოჯახური ფასეულობებისა და არასრულწლოვანთა დაცვის საქმეში მნიშვნელოვან წვლილს შეიტანს“, — განაცხადა მან.

რას ამბობს ვიქტორ ორბანი: უნგრეთის პრემიერ-მინისტრის თქმით, კობახიძე, "ყველა გამოწვევის მიუხედავად, ახერხებს ქვეყანაში ეროვნული იდენტობისა და კულტურის შენარჩუნებას".

მისივე თქმით, ირაკლი კობახიძე ქართულ პოლიტიკაში დიდ მოჭადრაკედ მიიჩნევა.

  • "ეს გასაოცარი არ არის, რადგან საქართველოს მრავალსაუკუნოვან ისტორიაში ჭადრაკი არის გეოპოლიტიკური თამაში. ყველა გამოწვევის, ზეძალის მიუხედავად, როგორ შეიძლება, ეროვნული იდენტობისა და კულტურის შენარჩუნება ქვეყანაში, ეს ნამდვილად არის მოჭადრაკის, გროსმაისტერის უნარი", — თქვა ვიქტორ ორბანმა.

ბოლო ხაზი: უნგრეთის პრემიერ-მინისტრი რუსეთის პრეზიდენტის, ვლადიმირ პუტინის მოკავშირედ მიიჩნევა.

  • ის წინააღმდეგი იყო, ევროკავშირს დაეწყო გაწევრიანების შესახებ მოლაპარაკებები უკრაინასთან.
  • ასევე, გასული წლის დეკემბერში, დაბლოკა 50 მილიარდი ევროს დახმარება, რომელსაც უკრაინა ევროკავშირისგან ელოდა.

ეროვნული იდენტობისა და ღირებულებების დაცვის აუცილებლობის შესახებ ხშირად საუბრობს მისი მოკავშირე ვლადიმირ პუტინიც.

გაიგე მეტი: პუტინი სუვერენიტეტის განმტკიცების უმნიშვნელოვანეს პირობად ტრადიციული ფასეულობების დაცვას ასახელებს