მოკლედ: მითების დეტექტორის თანახმად, ფაქტების გადამოწმების ევროპული სტანდარტების ქსელი (EFCSN) გმობს საქართველოს ხელისუფლების პირდაპირ თავდასხმებს ფაქტების გადამოწმების ორგანიზაციების მიმართ და მოუწოდებს შეწყვიტოს ფაქტების გადამოწმების ორგანიზაციების შევიწროება.

  • EFCSN 27 ქვეყნის 40-ზე მეტ ფაქტების გადამოწმების დამოუკიდებელი ორგანიზაციის ასოციაციას წარმოადგენს.

დეტალები: EFCSN-ის მიხედვით, დამოუკიდებელი ფაქტების გადამოწმება საჯარო სერვისია, ხოლო მათ ქართველ წევრებს აქვთ მოვალეობა, გადაამოწმონ მთავრობის წარმომადგენლების განცხადებები და თუ ისინი მცდარ ინფორმაციას შეიცავს, ამცნონ მოსახლეობას:

  • "არც ერთი მთავრობა არ უნდა ცდილობდეს, დააშინოს ფაქტების გადამოწმების ორგანიზაციები, რათა მათ ვეღარ მოახერხონ საკუთარი საქმის შესრულება".

EFCSN წერს, რომ საქართველოს მთავრობის მტკიცება, თითქოს ფაქტების გადამოწმების ორგანიზაციები მოსახლეობას ცენზურას უწესებენ მცდარია და მისი მიზანია "ხელი შეუშალოს თავისუფალი პრესის ლეგიტიმურ როლს ძალაუფლების წინაშე ანგარიშვალდებულების შექმნაში".

  • განცხადების მიხედვით, ფაქტების გადამოწმების ისეთი ონლაინ ინიციატივები, როგორიც Meta-ს მესამე მხარის ფაქტების გადამოწმების პროგრამაა, აქტიურია ევროკავშირის თითქმის ყველა ქვეყანაში და მათი ეფექტურობა დეზინფორმაციის წინააღმდეგ სამეცნიერო მტკიცებულებებითაც დასტურდება.

განცხადებაში აღნიშნულია, რომ შევიწროების კამპანია მიზანმიმართულად მიმდინარეობს სწორედ იმ დროს, როდესაც მთავრობას ხელახლა შემოაქვს რუსული კანონი, რომელიც "შეზღუდავს გამოხატვისა და შეკრების თავისუფლებას" და რომლის რეალური მიზანი "დამოუკიდებელი მედიისა და არასამთავრობო ორგანიზაციების მუშაობის შეფერხებაა".

  • "განსაკუთრებით შემაშფოთებელია ის, რომ საქართველოს მთავრობა უსაფუძვლოდ წარმოაჩენს თავის ქმედებებს ისე, თითქოს ისინი ევროკავშირის სტანდარტებთანაა თანხვედრაში", — წერია განცხადებაში.

EFCSN მოუწოდებს საქართველოს მთავრობას, შეწყვიტოს ფაქტ-მეტრისა და მითების დეტექტორის შევიწროება და შეახსენებს მას, რომ EFCSN-ის ვერიფიცირებული წევრები უკვე აკმაყოფილებენ ერთ-ერთ ყველაზე მკაცრ მოთხოვნებს, რომლებიც არსებობს გლობალურ მედია სექტორში გამჭვირვალობის, ეთიკისა და გამოძიების მეთოდოლოგიის კუთხით.

წინაისტორია: რუსული კანონის ხელახლა ინიციირების შემდეგ, ქართული ოცნების, პროსახელისუფლებო მედიასაშუალებებისა თუ ანონიმურ გვერდებზე, 120-მდე რეკლამა გამოქვეყნდა, სადაც კანონი მანიპულაციურად არის ახსნილი და მიჩქმალულია ზოგადი კონტექსტი.

ხელისუფლების კოორდინირებული კამპანია, რომელიც იყო მანიპულაციური და მოიცავდა მოქალაქის შეცდომაში შემყვან ცნობებს, სოციალურმა ქსელმა ფეისბუქმა ინფორმაციის გავრცელების საკუთარ სტანდარტებთან შეუსაბამობის გამო, დაბლოკა.

  • შესაბამისად, "გაქრა" პოსტები, რომელსაც მთავრობა მაღალჩინოსნების, პროპაგანდისტული გვერდებისა და ადმინისტრაციული ადამიანური რესურსის გამოყენებით ავრცელებდა.
  • ამის შემდეგ, მმართველმა პარტიამ იმ ადგილობრივი ფაქტჩეკერების დისკრედიტაციის კამპანია წამოიწყო, რომელიც ფეისბუქთან თანამშრომლობს.

გაიგე მეტი: სად გადაინაცვლა ოცნების პროპაგანდამ Facebook-ზე დაბლოკვის შემდეგ