მოკლედ: ქართული ოცნების თავმჯდომარე ირაკლი ღარიბაშვილი პრემიერ-მინისტრ ირაკლი კობახიძესთან კონფლიქტს უარყოფს და ამბობს, რომ თავისი პრემიერ-მინისტრობის დროს, მთავრობის ადმინისტრაციის წინ რკინის ჯებირები "უსაფრთხოებიდან გამომდინარე" აღმართა, ხოლო "თუ ირაკლი კობახიძეს განსხვავებული ხედვა აქვს, ნორმალურია".

  • ამის შესახებ ირაკლი ღარიბაშვილმა ზუგდიდში პარტიულ აქტივთან შეხვედრის შემდეგ განაცხადა.

დეტალები: "დამისახელეთ ქვეყანა, რომლის მთავრობის მეთაური ზის დაუცველ ღობის გარეშე შენობაში. მთავარი მიზანი და მოტივაცია, როდესაც მე ეს გადავწყვიტე, იყო უსაფრთხოებიდან გამომდინარე და რატომ? ეს დესტრუქციული ძალები პირდაპირ ჩვენს გმირ პოლიციელებს შეურაცხყოფდნენ კანცელარიის წინ, ხან ფქვილი დააყარეს, ხან საღებავი შეასხეს. ადმინისტრაციის თანამშრომლებს როგორ აწუხებდნენ, შიგნით შეცვივდებოდნენ ყოველგვარი საშვების გარეშე და საშინელებებს სჩადიოდნენ", — განაცხადა ირაკლი ღარიბაშვილმა.

კონტექსტი: გუშინ, 8 მარტს, მთავრობის ადმინისტრაციის წინ რკინის ჯებირების დემონტაჟი დაიწყო.

  • 2023 წლის 7 აპრილს საქართველოს ყოფილი პრემიერ-მინისტრის ირაკლი ღარიბაშვილის ბრძანებით, ადმინისტრაციასთან სკვერის მოსაწყობად სამუშაოები დაიწყო.
  • ღარიბაშვილს მთავრობის ადმინისტრაციასთან პარკის მოწყობა უნდოდა, სადაც ხეები უნდა დარგულიყო და შექმნილიყო ხელოვნური კუნძული, ეს ტერიტორია კი რკინის ჯებირებით იყო გამოყოფილი.
  • მთავრობის ადმინისტრაციის წინ რკინის ჯებირები ჯერ კიდევ ედუარდ შევარდნაძის დროს გაჩნდა, ხოლო მიხეილ სააკაშვილის პრეზიდენტობის დროს ჯებირები მოიხსნა. ირაკლი ღარიბაშვილის პრემიერ-მინისტრობის დროს, მათი აღმართვა ისევ დაიწყო, ახლა კი ირაკლი კობახიძემ გადაწყვეტილება შეცვალა.