მოკლედ: 2024 წლის მარტში, თბილისის სატრანსპორტო კომპანია უკვე მეორედ გაუხანგრძლივებს ხელშეკრულებას მეტრო ავლაბრის რეაბილიტაციაზე პასუხისმგებელ კომპანიას, შპს ბადა ქონთრაქშენს.

აღსანიშნავია, რომ ბაჩანა ადამიას ბადა გრუპს სახელმწიფოსგან 19 გამარტივებული შესყიდვა აქვს გაფორმებული. ხელშეკრულებების საერთო ღირებულება არის ¢ 4,208,014.26

  • ასევე, ბადა გრუპს სახელმწიფოს 9 ტენდერში აქვს მონაწილეობა მიღებული, აქედან 3 ტენდერი მოიგო, 3 წააგო, ხოლო — 3 ტენდერი არ შედგა.

დეტალები: On.ge ეცადა გაერკვია, თუ რა ვადით გახანგრძლივდება კონტრაქტი ამ კომპანიასთან და რა პირობებით, თუმცა, თბილისის სატრანსპორტო კომპანიის თქმით, ეს ჯერ უცნობია.

  • "ვერ გეტყვით, კონკრეტულად, რა ვადით გახანგრძლივდება კომპანიასთან ხელშეკრულება. მხოლოდ იმის თქმა შეგვიძლია, რომ ავლაბრის და ვარკეთილის მეტროსადგურების რეაბილიტაციის დასრულება 2024 წლის ზაფხულის ბოლოს იგეგმება", — გვითხრეს თბილისის სატრანსპორტო კომპანიაში.

სტრიქონებს შორის: 2022 წლის 19 ივლისს, თბილისის სატრანსპორტო კომპანიამ მეტროსადგურ ავლაბრის ზედა ვესტიბიულის რეკონსტრუქციისა და კაპიტალური სარემონტო სამუშაოებისთვის, პირდაპირი წესით გააფორმა ხელშეკრულება ბადა ქონსთრაქშენთან.

  • თავდაპირველად, ხელშეკრულება ძალაში იყო 2023 წლის 15 ივლისამდე.
  • საგულისხმოა, რომ მერიამ 2023 წლის 14 ივლისს კომპანიასთან დამატებით გააგრძელა ხელშეკრულების ვადა კიდევ 8 თვით — 2024 წლის 15 მარტამდე.

რატომ გაუხანგრძლივეს კომპანიას კონტრაქტის ვადა: მერის ინფორმაციით, მეტრო ავლაბრის რეაბილიტაციის თავდაპირველ პროექტში ცვლილებები შევიდა, რადგან "ვესტიბიულის დემონტაჟი განხორციელდა, რომელიც ძალიან მძიმე, ავარიულ მდგომარეობაში იყო".

  • თბილისის სატრანსპორტო კომპანიის თქმით, კომპანიასთან ხელშეკრულების ვადის გახანგრძლივება სწორედ ამ მიზეზით მოხდა და ვადაგადაცილებას ადგილი არ ჰქონია.

ბოლო ხაზი: On.ge-მ ასევე გაარკვია, რომ ვარკეთილის და ავლაბრის მეტროსადგურები, რეაბილიტაციის პროცესის დროს, არ დაიკეტება.

გაიგე მეტი: როგორ გამოიყურება მეტროსადგურები, რომელთა რეაბილიტაციის დასრულებას კალაძე ზაფხულის ბოლომდე გვპირდება