სკანდალური იმიჯით ცნობილმა ამერიკელმა რეპერმა Lil Nas X-მა 2024 წელი ახალი მუსიკის გამოშვებით დაიწყო. J Christ — ასე ჰქვია სიმღერას, რომელიც 24 წლის მუსიკოსმა ფანებს ვიდეოკლიპთან ერთად წარუდგინა 12 იანვარს. რეპერი, რომლის ნამდვილი სახელი მონტერო ლამარ ჰილია, თავადვე გახლავთ კლიპის რეჟისორი.

კლიპი კი რელიგიური მოტივებითაა გაჯერებული. ვიდეოს დასაწყისში ვხედავთ, როგორ ჩამწკრივებულან "სამოთხის" რიგში ცნობილი ადამიანების ორეულები. მათ შორის არიან მერაია ქერი, ბარაკ ობამა, ტეილორ სვიფტი, კანიე ვესტი, ოპრა უინფრი და სხვები.

შემდეგ "ჯოჯოხეთში" ვინაცვლებთ, სადაც ეშმაკი ადამიანებს ქვაბში ხარშავს. ვხედავთ დემონისა და რეპერის დაპირისპირებას კალათბურთის მოედანზეც. ამის მერე კლიპში ჯერ სახარებისეული ჯვარცმის ეპიზოდი ცოცხლდება (რომელშიც Lil Nas X, სავარაუდოდ, იესო ქრისტეს განასახიერებს), ბოლოს კი ყველაფერი აპოკალიფსური სცენით მთავრდება. ვიდეოს დასასრულს ჩნდება წარწერა, მონაკვეთი ბიბლიიდან: "ამრიგად, ვინც ქრისტეშია, ახალი ქმნილებაა. ძველმა განვლო და, აჰა, ყოველივე არის ახალი".

J Christ-ის გამოსვლა რეპერმა 8 იანვარს დააანონსა და ინსტაგრამზე ვიდეოკლიპიდან ჯვარცმის კადრი გამოაქვეყნა.

"ჩემი ახალი სინგლი ეძღვნება კაცს, რომელსაც ყველა დროის საუკეთესო დაბრუნების სცენა ჰქონდა", — დაწერა Lil Nas X-მა.

მუსიკოსის სიახლეს ჯერ კიდევ ამ პოსტის კომენტარებში მოჰყვა არაერთგვაროვანი გამოხმაურება და იგი კიდევ ერთხელ დაადანაშაულეს რელიგიური სიმბოლოების ყურადღების მისაქცევად გამოყენებაში.

"ვფიქრობ, ის ქრისტიანობასა და ქრისტეს დასცინის", — განაცხადა რეპერმა ბრაისონ გრეიმ, — "ამისთვის იყენებს ქრისტიანულ სიმბოლოებსაც".

Lil Nas X-ს სოციალურ ქსელში მოუწია განემარტა, რომ იგი "იესოს არ დასცინის". მოგვიანებით მან ინსტაგრამზეც იხუმრა, რომ უნივერსიტეტში "ქრისტიანული ლიდერობისა და ბიბლიის კვლევების" პროგრამაზე ჩაირიცხა.

"ვიცი, რომ ზოგს ახლა გეზიზღებით, მაგრამ მინდოდა, მეთქვა, რომ შემოდგომიდან კოლეჯში ბიბლიის კვლევების სწავლას ვიწყებ", — დაწერა მუსიკოსმა, — "ყველაფერი ხუმრობა როდია! ისევ სტუდენტი ვარ!".

გრემის ორგზის გამარჯვებული Lil Nas X თანამედროვე ჰიპ-ჰოპის ერთ-ერთი ყველაზე პოპულარული ვარსკვლავია. ჟურნალმა Time-მა იგი 2021 წლის 100 ყველაზე გავლენიან ადამიანს შორისაც დაასახელა.

ასევე იხილეთ: