სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.

OC Media-ს რედაქცია ამჯობინებს, არ გამოიყენოს ისეთი ტერმინები, როგორიცაა "დე ფაქტო", "არაღიარებული" ან "ნაწილობრივ აღიარებული", როდესაც სტატია ეხება ოკუპირებულ აფხაზეთს ან ე.წ. სამხრეთ ოსეთს, ასევე, მთიან ყარაბაღს. ეს არ ასახავს რედაქციის პოზიციას მათ სტატუსთან დაკავშირებით.

აფხაზეთში, 8 იანვარს ოპოზიციონერმა აქტივისტებმა, ბიზნესმენებმა და საზოგადოებისთვის ცნობილმა ადამიანებმა, მათ შორის — ახრა ბჟანიამ, ალხას ჯინჯოლიამ, თენგიზ ჯოპუამ, ლევან მიქაამ და ლაშა ზუხბამ, ახალი ოპოზიციური პლატფორმის ჩამოყალიბების შესახებ განაცხადეს.

ინიციატივის შესახებ საზოგადოებას მას შემდეგ გააცნეს, რაც, 27 დეკემბერს, პარლამენტმა რიგგარეშე სესიაზე მხარი დაუჭირა ბიჭვინთის აგარაკის რუსეთისთვის გადაცემას.

ბლოკს, ჯერჯერობით, სახელწოდება არ აქვს. მისი დამფუძნებლები მოუწოდებენ შეთანხმების ყველა მოწინააღმდეგეს, გაერთიანდნენ "აფხაზი ხალხის ეროვნული ინტერესების დასაცავად“.

აქტივისტებმა დაგმეს აფხაზეთის პარლამენტის მიერ გარიგების თითქმის ერთსულოვანი რატიფიკაცია და ისაუბრეს როგორც ოპოზიციის, ისე ფართო საზოგადოების უმოქმედობის შესახებ.

"[აფხაზეთში] არ არსებობს რეალური პოლიტიკური განხეთქილება ხელისუფლებასა და ოპოზიციას შორის, ან ოპოზიციის შიგნით. მთავარი საკითხია, შევინარჩუნებთ ჩვენს სუვერენიტეტს, თუ გავიზიარებთ მას[რუსეთთან]. ჩვენ მივდივართ პოლიტიკური ბანაკების ასეთი დაყოფისკენ”, — განაცხადა დამფუძნებელმა ალხას ჯინჯოლიამ.

კიდევ ერთმა დამფუძნებელმა, თენგიზ ჯოპუამ დაგმო აფხაზეთის ოპოზიცია "ორ სკამზე ჯდომისთვის, თუმცა ორივედან ჩამოვარდნის“ გამო. ამბობს, რომ რომ ოპოზიციური პოლიტიკოსები ცდილობდნენ, გაეკრიტიკებინათ მთავრობა და, ამავე დროს, არ დაეზიანებინათ მასთან ურთიერთობა.

მიუხედავად იმისა, რომ ბლოკს არ გამოუქვეყნებია რაიმე პროგრამა, ან ფორმალური ვალდებულებები, მისი მიზანია, ხელი შეუშალოს რუსეთის მიერ დაწესებული სხვადასხვა სადავო კანონის მიღებას, როგორიცაა "უცხოელი აგენტების კანონი“, სამშენებლო და უძრავი ქონების კანონი, კანონები, რომლებიც იძლევა მსხვილი ენერგეტიკული ობიექტების კერძო პირებისთვის გადაცემის საშუალებას და სხვა.

ჯოპუამ ხაზგასმით აღნიშნა, რომ უსაფუძვლოდ მიიჩნევს ბრალდებებს "ანტირუსულობის“ შესახებ მათ მიმართ, ვინც ეწინააღმდეგება აფხაზეთსა და რუსეთს შორის ურთიერთობების კიდევ უფრო გაძლიერების ინიციატივებს.

"რუსეთს აქვს საკუთარი ინტერესები და ის იცავს მათ. ჩვენ გვაქვს ჩვენი ინტერესები და ვალდებულები ვართ დავიცვათ ისინი“, — განაცხადა ჯოპუამ. "დღეს რუსეთში ზომიერი ნაციონალიზმი გამოიყენება; რატომ არ შეგვიძლია ჩვენც ასე მოვიქცეთ?"

ალხას ჯინჯოლიამ და ახრა ბჟანიამ დაამატეს, რომ თუ საჭირო იქნება იარაღის აღება აფხაზეთის დასაცავად ასეთი კანონებისგან, ისინი მზად არიან ამისათვის.

რუსეთის მიერ აფხაზეთზე კონტროლის გამკაცრება

ბიჭვინთის აგარაკის გადაცემა ბოლო იყო რუსული ინიციატივების სერიიდან, რომელიც, კრიტიკოსების თქმით, მიზნად ისახავს აფხაზეთის საშინაო საქმეებზე ქვეყნის კონტროლის გაძლიერებას.

შეთანხმება 1995 წლით თარიღდება, როდესაც აფხაზეთის პირველი პრეზიდენტი, ვლადისლავ არძინბა დათანხმდა აგარაკის გაქირავებას რუსეთის ფედერალური დაცვის სამსახურზე, 49 წლით. მას მოჰყვებოდა მიმდებარე ტერიტორია, დაახლოებით 180 ჰექტარი, სამი ნაგებობით, შავი ზღვის სანაპიროზე. ეს შეთანხმება უმოქმედო იყო 2022 წლის იანვრამდე, შემდეგ კი, მთავრობამ გადაწყვიტა მისი გაახლება და გახანგრძლივება, აქტივისტებისა და სამართლის ექსპერტების კრიტიკის ფონზე, რომლებიც ეჭვქვეშ აყენებდნენ ხელშეკრულების კანონიერებას.

ვადის გახანგრძლივება რატიფიცირებული იქნა 27 დეკემბერს, დილით. გაჩნდა ვარაუდი, რომ მთავრობამ რიგგარეშე სხდომა არასამუშაო დროს გამართა, რათა თავიდან აეცილებინა მასობრივი პროტესტი.

"პარლამენტის სხდომები შეიძლება ჩატარდეს ღამით მხოლოდ ომის დროს და საგანგებო სიტუაციებში. შეთანხმება უნდა გასულიყო პირველი მოსმენით, მეორე მოსმენით ცვლილებებით და შემდეგ, საბოლოო მოსმენით. ყველაფერი დარღვევებით გაკეთდა”, — განაცხადა ოპოზიციური ბლოკის ახალმა დამფუძნებელმა ახრა ბჟანიამ.

2020 წლიდან ხელისუფლება განიხილავს, რუსეთში მოქმედი კანონის მსგავსად, "უცხო ქვეყნის აგენტების კანონის“ მიღებას, რომელიც მიზნად ისახავს სამოქალაქო აქტივიზმის შეზღუდვას, დასავლური დაფინანსების შეზღუდვის გზით. 2023 წლის ნოემბერში პრეზიდენტმა ასლან ბჟანიამ ხელი მოაწერა კანონს, რომელიც აძლიერებს შეზღუდვებს საერთაშორისო ორგანიზაციებისთვის, მას შემდეგ, რაც ხელისუფლებამ გააკრიტიკა USAID აფხაზეთში ანტირუსული განწყობების გაღვივებისთვის.

აფხაზეთში, უცხო ქვეყნის მოქალაქეებისთვის უძრავი ქონების შეძენის ნების დართვის შესახებ ოდეა 2010 წლიდან განიხილება, თუმცა მას ოპოზიციის მწვავე წინააღმდეგობა მოჰყვა. კრიტიკოსები ამტკიცებდნენ, რომ ეს გამოიწვევს მიწის მასობრივ გაყიდვას რუს ინვესტორებზე, რუსეთის გავლენის გაზრდას ადგილობრივ ეკონომიკასა და პოლიტიკაზე, ასევე, შექმნის შესაძლებლობას, რუსეთის მოქალაქეობის მქონე ქართველებისთვის, შეიძინონ ქონება აფხაზეთში. უძრავი ქონების გაყიდვა, ამჟამად, აფხაზეთის კანონმდებლობით აკრძალულია.

ეს საკითხი, პერიოდულად, კვლავ ხდება ხოლმე აქტუალური, ბოლოს კი 2023 წლის ივნისში კვლავ იქცა განხილვის საგნად, სამშენებლო კანონის შესახებ სოხუმის მერსა და ქალაქის საკრებულოს შორის დაპირისპირების დროს.

2017 წელს შეიქმნა ერთობლივი საკოორდინაციო ცენტრი აფხაზეთისა და რუსეთის შინაგან საქმეთა სამინისტროებს შორის იმის შიშის ფონზე, რომ უწყება რუსეთის ოფიციალურ პირებს არაპროპორციულ ბერკეტს მიანიჭებდა აფხაზეთის საშინაო საკითხებში.