რამდენად ძნელი დასაჯერებელიც უნდა იყოს, 2004 წლის შემდეგ მთელი 20 წელი, საუკუნის მეხუთედი გავიდა. ამ ფაქტს კიდევ უფრო ამძაფრებს და დაუჯერებელს ხდის იმის გახსენება, თუ რას ვუსმენდით მაშინ. ჰოდა, თუკი ძველი ტელეფონი, CD-ფლეიერი ან კასეტა აღარ მოგეძებნებათ, ამ სტატიით მოგაგონებთ 2004 წლის მუსიკალურ მემკვიდრეობას.

1. ნატო გელაშვილის დეკემბერი

ქართველი კომპოზიტორისა და შემსრულებლის, ნატო გელაშვილის, 2004 წელს გამოსული ალბომიდან ერთი კაცი მიყვარდა ყველაზე ცნობილი სწორედ დეკემბერი გახდა. ეს სიმღერა კი პოპულარობას არ კარგავს — დარწმუნებული ვარ, ბევრი დღესაც მისი მოსმენით ხვდება ზამთრის პირველი თვის დადგომას.

2. სიას Breathe Me

მართალია, 20 წლის წინ სიას სახელი მაინცდამაინც ბევრმა არ იცოდა, მაგრამ ავსტრალიელმა მომღერალმა და კომპოზიტორმა 2004-ში უკვე მესამე სტუდიური ალბომი, Colour the Small One, გამოუშვა და Breathe Me-ც სწორედ ამ ჩანაწერის ნაწილია. სიმღერა ისეთ საკითხებს შეეხება, როგორიც ქრონიკული დეპრესია და ადიქციაა — პრობლემები, რომელთან გამკლავებაც თავად მუსიკოსს მოუწია.

3. ლექს-სენის და თიკოს გესმოდეს

2000-იანი წლების ქართული მუსიკა ლექს-სენის გარეშე წარმოუდგენელია. კიდევ უფრო ძნელია, ქართულ ჰიპ-ჰოპზე მოჰყვე და გესმოდეს არ ახსენო. ლექს-სენისა და თიკო სადუნიშვილის დუეტი 2004-ის ნამდვილი ჰიტი იყო, რომლის მოსმენაც დღემდე ნოსტალგიას აღვიძებს ჩვენში...

4. Green Day-ის Wake Me Up When September Ends

ნოსტალგიას კიდევ ერთი, უცხოური ჰიტი უხდება ძალიან — Wake Me Up When September Ends. ეს ერთ-ერთი სინგლია ამერიკული როკჯგუფის, Green Day-ის, მეშვიდე სტუდიური ალბომიდან American Idiot. მის მოსმენას ერთდროულად მოაქვს 2000-იანების დასაწყისისა და ზაფხულის მიწურულის განწყობა.

5. Eminem-ის Just Lose It

თუ არ გახსოვთ, შეგახსენებთ, რომ 2000-იანებში მსოფლიო ჰიპ-ჰოპით იყო შეპყრობილი. ეგ ამბავი, რა თქმა უნდა, 1990-იან წლებში დაიწყო, მაგრამ ახალმა საუკუნემ ჟანრში ახალი ტენდენციებიც დაამკვიდრა. ტრენდსეტერად კი, რა გასაკვირია, რომ ემინემი მოგვევლინა.

6. Akon-ის Lonely

აი, ხომ გითხარით, ჰიპ-ჰოპით ვიყავით შეპყრობილი-მეთქი. 2000-იანებში გამოჩნდა ეიკონიც, რომელმაც 2004 წელს სადებიუტო ალბომი Trouble გამოუშვა. ალბომიდან ერთ-ერთი სიმღერა, Lonely, მსოფლიო ჰიტი გახდა და უამრავი ქვეყნის ჩარტების სათავეში აღმოჩნდა, ახალბედა არტისტს კი საყოველთაო ცნობადობაც მოუტანა.

7. გვენ სტეფანის Rich Girl

2000-იანებში დაიწყო გვენ სტეფანის ვარსკვლავური სოლო კარიერაც და მის პირველ ნაბიჯად სადებიუტო ალბომი Love. Angel. Music. Baby. იქცა. მანამდე როკჯგუფ No Doubt-ის წევრობით ცნობილმა სტეფანიმ 2004-ში პირველ ალბომს სინგლი Rich Girl-იც მოაყოლა, რომელსაც განსაკუთრებული კომერციული წარმატება ხვდა წილად.

8. Keane-ის Somewhere Only We Know

ახალი ათასწლეულის დასაწყისში მელანქოლიისთვის სულაც არ გვეცალა, მაგრამ თუკი ასეთ განწყობაზე ყოფნას მოვისურვებდით, Keane-ის Somewhere Only We Know ყოველთვის გვეგულებოდა CD-ფლეიერში. ამ სიმღერით და ალბომით Hopes and Fears ინგლისურმა ჯგუფმაც პირველი ნაბიჯები გადადგა მუსიკის ინდუსტრიაში.

9. Usher-ის Yeah!

რაც უნდა იყოს, საკუთარი კასეტები და CD-ფლეიერებიც არ გვაცდიდნენ მელანქოლიურ განწყობაზე დიდხანს ყოფნას და ასე არსაიდან გამოჩნდებოდა, მაგალითად, აშერი. ძალიან ძნელი კია, აშერის სიმღერებს სხეული არ ააყოლო. მით უმეტეს, თუ ეს სიმღერა ზუსტად 20 წლის წინ გამოშვებული და მონატრებული Yeah! არის.

10. არაშის Boro Boro

სანამ არაში ყველას Temptation-ზე აგვაცეკვებდა, 2004-ში სადებიუტო სინგლი Boro Boro გამოუშვა. სიმღერაზე გადაღებული ვიდეოკლიპი წლების განმავლობაში ტრიალებდა ქართული ტელეარხების ეთერში, ამიტომ, სულ არაა გასაკვირი, რომ ეს მელოდია კარგა ხანი აკვიატებული გვქონდა.

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...