"ევროკავშირი თურქეთს დროს აკარგვინებს. თურქეთისთვის შვება იქნება, თუკი ევროკავშირი პირდაპირ ეტყვის მას უარს წევრობაზე",- უთხრა თურქეთის პრეზიდენტმა, რეჯეპ ტაეპ ერდოღანმა BBC-ის.

HARDtalk-ში, ზეინაბ ბადავისთან საუბრისას, ერდოღანმა განაცხადა, რომ თურქეთის მოსახლეობის უმრავლესობას "აღარ უნდა ევროკავშირი" და მისი [ევროკავშირის] მიდგომები თურქეთის მიმართ არცისე გულრწფელია:

"მიუხედავად ამ ყველაფრისა, ჩვენ კიდევ ცოტა ხნით ვიქნებით გულრწფელი ევროკავშირთან".

ერდოღანმა თქვა, რომ თურქეთს "საკუთარ ორ ფეხზე დგომა შეუძლია". მან ასევე უარყო, რომ თურქეთში 150 ჟურნალისტია დაპატიმრებული და თქვა, რომ მედიის მხოლოდ ორი წარმომადგენელია ციხეში:

"აქ არავინ არ დაუკავებიათ ჟურნალისტობის გამო. ამჟამად, მხოლოდ ორი ჟურნალისტია ციხეში".

ერდოღანმა განაცხადა, რომ მისმა ოპონენტებმა სასამართლოში, პოლიციასა და მედიაშიც შეაღწიეს: "სწორედ ასე დაგეგმეს და ეცადნენ სახელმწიფოს გადატრიალებას. ისინი ერთად მუშაობენ, შემდეგ კი, თავშესაფას ეძებენ, როგორც ჟურნალისტები. ეს მიუღებელია".

BBC-ის ცნობით, გასული წლის ივლისში, თურქეთში სახელმწიფო გადატრიალების მცდელობის შემდეგ, 160 მედიასაშუალება დაიხურა და 2 500 ჟურნალისტი გაათავისუფლეს სამსახურიდან.

თურქეთმა ევროკავშირში გაწევრიანებაზე განაცხადი 1987 წელს გააკეთა.