სტრატეგიული კომუნიკაციების ექსპერტი საიმონ ვესტი სტრატეგიულ კომუნიკაციებში, თანამედროვე საინფორმაციო გარემოში პროპაგანდისა და დეზინფორმაციის სამყაროში ეფექტური კომუნიკაციის ორგანიზებაზე მასტერკლასს ჩაატარებს. ეს მასტერკლასი საქართველოში 22 ივლისსაა დაგეგმილი.

კურსზე დასასწრებად აუცილებელია რეგისტრაციის გავლა.

საიმონ ვესტი ბრიტანეთის შეიარაღებული ძალების ვიცე-პოლკოვნიკია, ოცდაათწლიანი სამხედრო კარიერით. ის სტრატეგიული კომუნიკაციების ექსპერტია, რომელიც 2015 წელს, ძალადობრივი კონფლიქტის თავიდან აცილების საქმეში შეტანილი განსაკუთრებული წვლილისთვის, დიდი ბრიტანეთის დედოფალმა უმაღლესი ორდენით, "ბრიტანეთის იმპერიის წარჩინებული ოფიცრის წოდებით" დააჯილდოვა. ის 15 წლის განმავლობაში სხვადასხვა გადაცემაში სამხედრო ექსპერტის სტატუსით მონაწილეობდა.

გარდა ამისა, ვესტმა ნატოს სტრატეგიული კომუნიკაციების სრულყოფის ცენტრში, როგორც ოპერაციების მთავარმა მხარდამჭერმა, დაასრულა ორწლიანი როტაცია. როტაციის პერიოდში მისი მოვალეობა ნატოს წევრ და პარტნიორ ქვეყნებში საქართველოს, უკრაინისა და მოლდოვის ჩათვლით, ოპერატიული დონის მხარდაჭერა, კონსულტირება და ტრენინგების ჩატარება იყო. ახლა ის საინფორმაციო აქტივობების მიმართულებით, გაერთიანებული სამეფოს თავდაცვის სამინისტროს მრჩეველია.

2008 წელს საიმონ ვესტი ერთ-ერთი პირველი სტრატეგიული კომუნიკაციების მრჩეველი იყო ავღანეთში. მუშაობდა ყანდაჰარშიც, სამხრეთ სარდლობის რეგიონული შტაბში, აგრეთვე სამხრეთ ავღანეთში ამერიკის შეერთებული შტატების ცენტრალურ სარდლობაში, სადაც გენერალ ჯეიმს მატისის მთავარი "ბრიფერი" იყო. მას უკავშირდება ნატოს სახმელეთო ოპერაციების დოქტრინის გადამუშავება და განახლება.