რა ხდება: ადამიანის უფლებათა ცენტრი (HRC) საჩივრით მიმართავს თბილისის სააპელაციო სასამართლოს.

• ორგანიზაცია მოითხოვს, გაუქმდეს თბილისის საქალაქო სასამართლოს ადმინისტრაციულ საქმეთა კოლეგიის მიერ მიღებული გადაწყვეტილება, საპროტესტო აქციის მონაწილე სამოქალაქო აქტივისტების — ლაშა ჯანჯღავას და ლევან ნიშნიანიძის ადმინისტრაციულ სამართალდამრღვევად ცნობის და 2000 ლარით დაჯარიმების შესახებ.

რა ვიცით ამ ამბავზე: 2023 წლის 2 ივნისს, საქართველოს პარლამენტთან გამართულ აქციაზე, სახელწოდებით ირა*ლი, ლევან ნიშნიანიძე და ლაშა ჯანჯღავა ადმინისტრაციული წესით დააკავეს.

• ლევან ნიშნიანიძე და ლაშა ჯანჯღავა ამ აქციაში მონაწილეობდნენ და ბანერების გამოყენებით გამოხატავდნენ თავიანთ პროტესტს ხელისუფლების წარმომადგენლების ანტიდასავლურ განცხადებებთან დაკავშირებით.

პრობლემაა, რომ HRC-ის მიხედვით,

• დაკავების დროს დაკავებულებისთვის პოლიციას არ განუმარტავს უფლებები და არც დაკავების მიზეზი და საფუძვლები.
• ასევე, დაკავებამდე პოლიციის მხრიდან არ მომხდარა არანაირი გაფრთხილება.
• დაკავებული ლაშა ჯანჯღავა და ლევან ნიშნიანიძე პოლიციის თანამშრომლებმა გადაიყვანეს დუშეთის რაიონის დროებითი მოთავსების იზოლატორში.
• პოლიციამ ყოველგვარი დასაბუთების გარეშე, ადმინისტრაციული წესით დაკავებულებს გაუგრძელა 24-საათიანი დაკავების ვადა და შემდგომ ისე, რომ საქმე ჯერაც არ ჰქონდათ შეტანილი სასამართლოში, დაახლოებით 35 საათის გასვლის შემდეგ, ხელწერილით გაათავისუფლეს დროებითი მოთავსების იზოლატორიდან.
• შინაგან საქმეთა სამინისტრო ლაშა ჯანჯღავას და ლევან ნიშნიანიძეს ედავებოდა ადმინისტრაციულ სამართალდარღვევათა კოდექსის 166-173-ე მუხლების დარღვევას, რაც გულისხმობს წვრილმან ხულიგნობას და სამართალდამცავი ორგანოს თანამშრომლის კანონიერი მოთხოვნისადმი დაუმორჩილებლობას.

რა გადაწყვიტა სასამართლომ: ლაშა ჯანჯღავას და ლევან ნიშნიანიძის ადმინისტრაციული დაკავების საქმე თბილისის საქალაქო სასამართლომ განიხილა.

• ადამიანის უფლებათა ცენტრის თანახმად, შსს-ს არ წარუდგენია არანაირი სახის ვიდეომტკიცებულება და სამინისტროს წარმომადგენელი თავის მოსაზრებას ამყარებდა მხოლოდ დაკავებაში მონაწილე მოწმე პოლიციელების ჩვენებზე.
• "სასამართლოში, პოლიციელების მიერ მოწმის სახით მიცემული ჩვენებები იყო არათანმიმდევრული, ურთიერთგამომრიცხავი და არსებითად ეწინააღმდეგებოდა საქმეში დაცვის მხარის მიერ წარდგენილ ვიდეომტკიცებულებებს, სადაც უწყვეტ ვიდეოკადრზე იყო ასახული დაკავების პროცესი", — წერია ორგანიზაციის განხადებაში.

ბოლო ხაზი: HRC აცხადებს, რომ თბილისის საქალაქო სასამართლომ არ გაიზიარა საქმეზე წარდგენილი სანდო და რეალური მტკიცებულებები და პოლიციელების ცრუ ჩვენებებზე დაყრდნობით მიიღო გადაწყვეტილება ლაშა ჯანჯღავას და ლევან ნიშნიანიძის ადმინისტრაციულ სამართალდარღვევათა კოდექსის 166-ე და 173-ე მუხლებით სამართალდამრღვევებად ცნობის თაობაზე.