რა მოხდა: 19 სექტემბერს აზერბაიჯანმა მთიან ყარაბაღი მძიმე არტილერიით დაბომბა.

  • ბაქო ამტკიცებდა, რომ ეს ანტიტერორისტული ოპერაციაა, რომლის სამიზნე არ არის სამოქალაქო დასახლებები ან ინფრასტრუქტურა და მხოლოდ სომხეთის შეიარაღებული ძალების სამხედრო ობიექტებს ესვრიან.
  • თუმცა ყარაბაღის ოფიციალური პირების განცხადებით, დაიბომბა საცხოვრებელი სახლები, რასაც მსხვერპლი მოჰყვა.

რას ამბობდნენ მხარეები: აზერბაიჯანი ირწმუნებოდა, რომ სამმხრივი დეკლარაციის დებულებების უზრუნველსაყოფად, ყარაბაღის ეკონომიკურ რეგიონში ფართომასშტაბიანი პროვოკაციების აღსაკვეთად, სომხეთის შეიარაღებული ძალების მათი ტერიტორიებიდან გასაყვანად, ასევე, აზერბაიჯანის კონსტიტუციური სისტემის აღსადგენად, რეგიონში ანტიტერორისტული ღონისძიებები დაიწყეს.

  • გარდა ამისა, აზერბაიჯანის საგარეო საქმეთა სამინისტრომ განაცხადა, რომ ერთადერთი გზა რეგიონში მშვიდობისა და სტაბილურობის უზრუნველსაყოფად ეთნიკური სომეხი ჯარების სრული გაყვანა და სტეფანაკერტში მთავრობის დაშლაა.

  • სომხეთი აცხადებდა, რომ აზერბაიჯანის ოფიციალურ შეტყობინებებსა და მედიაში კვლავ ჩნდება ყალბი მტკიცება იმის შესახებ, თითქოს მთიან ყარაბაღში სომხეთის რესპუბლიკის შეიარაღებული ძალების დანაყოფები, სამხედრო ტექნიკა და პერსონალია.
  • პრემიერმინისტრის, ნიკოლ ფაშინიანის შეფასებით, ეს არის აზერბაიჯანის მცდელობა, სომხეთი სამხედრო კონფლიქტში ჩაითრიოს.

ბოლო სიახლეები: მთიანი ყარაბაღის მთავრობამ განაცხადა, რომ დათანხმდა რუსეთის სამშვიდობო კონტინგენტის ცეცხლის შეწყვეტის წინადადებას.

  • მათი განმარტებით, შეთანხმება მოიცავს: სომხეთის რესპუბლიკის ნებისმიერი შეიარაღებული ძალების გაყვანას, მთიანი ყარაბაღის შეიარაღებული ძალების დაშლასა და სრულ განიარაღებას.

  • "აზერბაიჯანული მხარის მიერ წამოჭრილი საკითხები რეინტეგრაციის, მთიანი ყარაბაღის სომხების უფლებებისა და უსაფრთხოების უზრუნველყოფის, აგრეთვე აზერბაიჯანის კონსტიტუციის ფარგლებში მთიანი ყარაბაღის მოსახლეობის საარსებო წყაროს უზრუნველყოფის შესახებ, მიღწეული შეთანხმების მიხედვით, განიხილება ადგილობრივი სომეხი მოსახლეობისა და აზერბაიჯანის რესპუბლიკის ცენტრალური ხელისუფლების წარმომადგენლების შეხვედრაზე, რომელიც გაიმართება ქალაქ ევლახში 2023 წლის 21 სექტემბერს", — განაცხადეს ყარაბაღის ოფიციალურმა პირებმა.
  • თავის მხრივ აზერბაიჯანის თავდაცვის სამინისტრომ თქვა, რომ ყარაბაღის თავდაცვის არმია დანებდა და დაშლაზე თანახმაა.
  • მათივე თქმით, ყველა იარაღი და მძიმე ტექნიკა აზერბაიჯანს გადაეცემა და ეს რუსეთის სამშვიდობო კონტინგენტთან კოორდინაციით მოხდება.