ჩრდილოეთ კორეის განცხადებით, ამერიკელმა ჯარისკაცმა გასულ თვეში მათი საზღვარი უკანონოდ გადაკვეთა. ჩრდილოეთ კორეა ირწმუნება, რომ 23 წლის ტრევის კინგი ასე იმიტომ მოიქცა, რომ თავშესაფარს ეძებდა. განცხადებაში ნათქვამია, რომ ჯარისკაცს "არაადამიანური მოპყრობისა და რასობრივი დისკრიმინაციის გამო" თავშესაფრის პოვნა სურდა.

23 წლის ჯარისკაცმა სამხრეთ კორეიდან ჩრდილოეთ კორეის საზღვარი 18 ივლისს გადაკვეთა. ამის შემდეგ აშშ-ს ჯარისკაცის ადგილსამყოფლის შესახებ ინფორმაცია არ ჰქონია, ახლა კი მოლაპარაკებების გზით ცდილობს, რომ ჯარისკაცი სახლში უსაფრთხოდ დააბრუნოს, რაშიც გაეროც ჩართულია.

ფოტო: Reuters

"გამოძიების დროს ტრევის კინგმა აღიარა, რომ ჩრდილოეთ კორეაში გადასვლა გადაწყვიტა, რადგან აშშ-ის არმიის მიმართ არაადამიანური მოპყრობისა და რასობრივი დისკრიმინაციის გამო უარყოფითი დამოკიდებულება ჰქონდა", — ნათქვამია ჩრდილოეთ კორეის საინფორმაციო სააგენტოს განცხადებაში.

ჩრდილოეთ კორეა ჯერჯერობით არ ავრცელებს ინფორმაციას იმის შესახებ, საზღვრის უკანონოდ გადაკვეთის გამო ჯარისკაცი სამართლებრივად დაისჯება თუ არა. გარდა ამისა, განცხადებაში ჯარისკაცის ადგილსამყოფლის შესახებაც არაფერი იყო ნახსენები.

იმ ფაქტიდან გამომდინარე, რომ ჩრდილოეთ კორეის განცხადებაში ხაზგასმულია საზღვრის უკანონოდ გადაკვეთა, ექსპერტების ვარაუდით, კინგს ქვეყანაში დარჩენის უფლებას მაინც არ მისცემენ. თუმცა ამ ეტაპზე ჩრდილოეთ კორეა ტრევის კინგის აშშ-ში დაბრუნების შესახებ მოლაპარაკებების დაწყებას არ ჩქარობს.