ლეგენდარული ირლანდიელი მომღერლის, შინეიდ ო'კონორის, პატივსაცემად მუსიკოსის მშობლიურ ქვეყანაში დროებითი ინსტალაცია შექმნეს. ზღვის ნაპირას, ბორცვზე განთავსებული 10-მეტრიანი ინსტალაცია, რომელზეც მომღერლის სახელი და ქვეყნის ირლანდიური დასახელება წერია, პატარა ქალაქ ბრეის გადაჰყურებს.

ო'კონორი ბრეიში 15 წელი ცხოვრობდა. ამავე ქალაქში დაკრძალავენ მას.

"შინეიდს ბრეიში ცხოვრება მოსწონდა და აქაურებიც უყვარდა", — წერს მუსიკოსის ოჯახი გავრცელებულ განცხადებაში.

გადამუშავებადი პლასტმასისგან დამზადებული ინსტალაცია ბორცვზე კვირის ბოლომდე დარჩება.

ფოტო: The Tenth Man

"შინეიდზე მისი გარდაცვალების შემდეგ იმდენი რამ ითქვა, არც კი ვიცი, რა დავამატო", — ამბობს ინსტალაციის შემქმნელი კრეატიული სააგენტოს ხელმძღვანელი, რიჩარდ სიბრუკი, — "უბრალოდ, გვინდოდა, ამით გვეჩვენებინა, თუ რამდენს ნიშნავდა იგი ჩვენი პატარა ქვეყნისთვის".

სწორედ იმის აღსანიშნავად, რომ ირლანდიისთვის შინეიდ ო'კონორი ბევრს ნიშნავდა, დედაქალაქ დუბლინში სემუელ ბეკეტის ხიდი რამდენიმე დღის წინ მუსიკოსის ჰიტის Nothing Compares 2 U ტექსტით განათდა.

შინეიდ ო'კონორი 26 ივლისს, 56 წლის ასაკში გარდაიცვალა. მუსიკოსის სიკვდილის მიზეზი ამ დროისთვის უცნობია.

დუბლინელმა ო'კონორმა მუსიკალური კარიერა 1980-იანი წლების მეორე ნახევარში დაიწყო, როცა სადებიუტო ალბომი The Lion and the Cobra გამოუშვა. ალბომი არაერთი ქვეყნის ჩარტებში აღმოჩნდა. არანაკლებ წარმატებული გამოდგა 1990 წელს გამოშვებული მეორე სტუდიური ალბომი I Do Not Want What I Haven't Got, რომლის შვიდ მილიონზე მეტი ასლი გაიყიდა მსოფლიოში. ერთ-ერთი სინგლი ალბომიდან — Nothing Compares 2 U — რომელიც პრინსის დაწერილია, მოგვიანებით ნამდვილი ჰიტი გახდა. ბილბორდის მუსიკალურ დაჯილდოებაზე სიმღერა წლის #1 მსოფლიო სინგლად დასახელდა.

ასევე იხილეთ: