პარტია ქართული ოცნების ერთ-ერთი ლიდერი, საპარლამენტო უმრავლესობის წევრი მამუკა მდინარაძე მიიჩნევს, რომ კახა კალაძის კანდიდატურა თბილისის მერის პოსტზე, უალტერნატივოა და მისივე აზრით, ის იქნება ისეთივე წარმატებული მერი, როგორიც სხვა სფეროებში იყო აქამდე:

"ღრმად ვარ დარწმუნებული, რომ როგორც ის იყო წარმატებული სპორტში, ენერგეტიკაში და ყველა სფეროში, სადაც ის იყო ზოგადად, ისეთივე წარმატებული იქნება თბილისის მერიის თანამდებობაზე და თბილისი იქნება საერთოდ ახალი ბრენდი".

დღეს, პირველ ივლისს ქართული ოცნების პოლიტსაბჭოს წევრებმა ერთხმად დაუჭირეს მხარი ვიცე-პრემიერ კახა კალაძის კანდიდატურას, თბილსიის მერის არჩევნებისთვის.

დღესვე, მთაწმინდის პარკში, პრემიერ-მინისტრი, გიორგი კვირიკაშვილი თბილისის მერობის კანდიდატს 20 საათზე ოფიციალურად წარადგენს.

საქართველოში თვითმმართველობის არჩევნები ოქტომბრის ბოლოს ჩატარდება. საქართველოს პრეზიდენტის, გიორგი მარგველაშვილის განცხადებით, მთავრობასთან შეთანხმებით გადაწყდა რომ იგი ოქტომბრის მესამე კვირის ბოლოს გაიმართება.