ამ სტატიის დაწერა დღეს მომხდარი მცირე ონლაინ-ინციდენტის შემდეგ გადავწყვიტეთ.

ყველაფერი იქიდან დაიწყო, რომ ერთ-ერთმა ქართულმა გვერდმა, რომელსაც შეგნებულად არ ვლინკავთ და არც მის სახელს ვწერთ, ჩვენი ერთ-ერთი სტატიის ლინკის ქვეშ შეურაცხმყოფელი კომენტარები დატოვა.

გვერდისა და კომენტარის ავტორის მტკიცებით, ბექა ბერიძის ქართული სიტყვების ხელოვნება, სინამდვილეში, "გვერდის მთავარ ადმინს ეკუთვნის", ხოლო ამ ფაქტის დასტურად ის სტატიის კომენტარებში სპამის სახით ტოვებდა ზემოაღნიშნულ გვერდზე დადებულ ალბომს და ამტკიცებდა, რომ ეს ნამუშევრები სინამდვილეში 2015 წელსაა შექმნილი და დაპოსტილი.

თუმცა საქმე სხვაგვარადაა.

ამ სკინშოტზე ჩანს, რომ პოსტის განთავსების თარიღი 2015 წელია, მაგრამ თარიღის გვერდით არსებულ საათის ხატულას თუ მაუსს გადაატარებთ, გამოჩნდება პოსტის დადების რეალური თარიღი - ამ შემთხვევაში 2017 წლის 29 ივნისი, 17:54.

Facebook ე.წ. Backdate ანუ უკუდათარიღების ფუნქციით იძლევა საშუალებას პოსტი ძველი თარიღით განათავსოთ, მაგრამ არ მალავს განთავსების რეალურ დროს.

ასევე, გვერდის მიერ დადებულ ალბომში ჩანს, რომ ნამუშევრებს, რომელსაც ეს გვერდი თავისად ასაღებს, ის ნაწილი, რომელზეც ორიგინალში ავტორის ხელმოწერაა განთავსებული ამოჭრილი აქვს:

ასეთი სახის პლატიაგობა ქართულ ინტერნეტ სივრცეში და განსაკუთრებით Facebook-ზე სიახლე არ არის. პოპულარობის მოპოვების მიზნით, გვერდები ხშირად იპარავენ სხვა ადამიანების ნამუშევრებს და თავიანთ პროექტებად ასაღებენ.

იმ შემთხვევაში თუ თქვენი ნამუშევარი პლაგიატების მსხვერპლი გახდა, პრობლემის მოგვარება უადვილესად შეიძლება.

საქმე ისაა, რომ Facebook-ს აქვს სპეციალური ფორმა, რომელიც საავტორო უფლებების დარღვევისას უნდა შეავსოთ. ჩვეულებრივი რეპორტისგან განსხვავებით, ამ შემთხვევაში, Facebook-ის ადმინისტრაცია გაცილებით ყურადღებით მოეკიდება თქვენს რეპორტს, რადგან ფორმაში დეტალურად ითხოვენ ინფორმაციას ავტორისა და საავტორო უფლებების დამრღვევის შესახებ.

გამოიყენეთ ეს ფორმა და დაიცავით თქვენი ნამუშევრები.