ჩემი ცოლის დაქალების ტელეეკრანებზე დაბრუნებამდე კვირაზე სულ ოდნავ მეტი დრო რჩება. პოპულარული ქართული სერიალის ახალი, მე-19 სეზონის პრემიერა ფორმულას ეთერში 7 ივლისს შედგება.

მანამდე კი, სერიალის შემქმნელები პატარ-პატარა ნაწყვეტებით გვანებივრებენ. ამჯერად, ჩცდ-ის ახალი სეზონის კიდევ ერთი თიზერი გავრცელდა, რომელშიც მაყურებლის ერთ-ერთ საყვარელ გმირს, შავლეგო "შაგუ" მადლიანს, უჩვეულო გარემოში ვხედავთ. საქმე ისაა, რომ ვაკელი მადლიანი მისთვის ასე საძულველ სოფელში იმყოფება და, როგორც ჩანს, უკმაყოფილოა, რომ დილით მამალი აღვიძებს. ეს სახალისო ნახევარწუთიანი მონაკვეთი კი ნამდვილად დამაინტრიგებელია. მით უმეტეს, რომ ეპიზოდში, შავლეგოსთან ერთად, ორ უცნობ პერსონაჟსაც ვხედავთ.

ჩცდ-ის ამ დროისთვის ბოლო, მე-18 სეზონი გასული წლის ივლისში დასრულდა. მას შემდეგ სერიალის ბედი გაურკვეველი იყო. თუმცა, რამდენიმე კვირის წინ ფორმულას გენერალურმა დირექტორმა ზუკა გუმბარიძემ სერიალის დაბრუნება დააანონსა, მალევე კი ჩცდ-ის პროდიუსერისა და შემოქმედებითი გუნდისგან ახალი სეზონის შესახებ მნიშვნელოვანი სიახლეებიც შევიტყვეთ.

ფორმულა კრეატივის შექმნილი ჩცდ მაყურებელმა პირველად 2011 წელს იხილა. ის თავდაპირველად რუსთავი 2-ზე გადიოდა, მოგვიანებით კი, 2019 წელს, სერიალის შემქმნელების დაფუძნებულ ახალ არხზე, ფორმულაზე, გადაინაცვლა.

რაც შეეხება სერიალის მე-19 სეზონს, მის ახალ სერიებს ყოველ პარასკევსა და შაბათს, საღამოს 10 საათზე ვიხილავთ.

ასევე იხილეთ:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…