დღეს, 28 ივნისს, საპარლამენტო უმცირესობა ევროპული საქართველო, აფგან მუხტარლის საქმესთან დაკავშირებით, საპარლამენტო საგამოძიებო კომისიის შექმნას მოითხოვს.

„პარლამენტი უნდა ჩაერთოს ამ საქმეში იმიტომ, რომ სამართალდამცავ ორგანოებს ნდობა არ გააჩნია“ - აცხადებს პარტიის წევრი სერგი კაპანაძე.

მისი თქმით, საკითხს ევროპული საქართველო დღევანდელ საპარლამენტო სესიაზე წარადგენს.

"ყველაფერს გავაკეთებთ იმისთვის, რომ ეს საკითხი იყოს განხილული საკმაოდ მწვავედ. იმედია, რომ საღი აზრი ეყოფა უმრავლესობის ნაწილს მაინც, რომ მხარი დაუჭირონ ამ ინიციატივას. მიგვაჩნია, რომ ეს გამოძიება უნდა იყოს კომპლექსური და ბოლომდე მიყვანილი. მნიშვნელოვანია, რომ პარლამენტის ზედამხედველობა არსებობდეს" - ამბობს კაპანაძე.

გუშინდელი განცხადების თანახმად, აფგან მუხტარლის საქმეს მუდმივ მონიტორინგს გაუწევს საქართველოს პრეზიდენტი გიორგი მარგველაშვილი.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.