პოლ მაკარტნიმ ბითლზის "ბოლო სიმღერის" შესაქმნელად ხელოვნური ინტელექტი დაიხმარა. BBC RADIO 4-თან ინტერვიუში მუსიკოსი ამბობს, რომ სიმღერა ახლახან დასრულდა და შემდეგ წელს გამოვა, ასევე ამატებს იმასაც, რომ ჩანაწერის შესაქმნელად ძველი კასეტიდან ჯონ ლენონის ხმა გამოიყენეს.

მართალია, მომღერალს სიმღერის სახელი არ უთქვამს, თუმცა სავარაუდოა, რომ მან ჯონ ლენონის 1978 წლის კომპოზიცია Now And Then გამოუშვას. ეს სიმღერა ერთ-ერთი იყო კომპოზიციების სერიიდან For Paul, რომელიც ჯონ ლენონმა მაკარტნისთვის სიკვდილამდე ცოტა ხნით ადრე შექმნა და რომლის ჩანაწერიც იოკო ონომ მას 1994 წელს გადასცა.

ამ სერიის 2 სიმღერა Free As A Bird და Real Love ლეგენდარულმა ჯგუფმა 1995-1996 წლებში ბითლზის სახელით გამოუშვა. მაკარტნის თქმით, ბენდმა Now And Then -ის ჩაწერაც დაიწყო, თუმცა ბოლომდე არ მიუყვანიათ. მომღერალი ყვება, რომ მაშინ The Beatles-ის წევრმა ჯორჯ ჰარისონმა ჩანაწერი დაიწუნა და თქვა, რომ ზედმეტად უხარისხო იყო. პოლი კი თვლიდა, რომ სიმღერას ძალიან ლამაზი მისამღერი ჰქონდა და რადგან მას ჯონ ლენონი ასრულებდა, უნდა გამოეშვათ.

სიმღერის ჩაწერის შანსი პიტერ ჯექსონის ახალ დოკუმენტურ ფილმთან Get Back-თან ერთად გაჩნდა, სადაც რეჟისორი ემილი დე ლა რეი ხელოვნურ ინტელექტს "ასწავლის", როგორ შეამჩნიოს და ერთმანეთისგან გაარჩიოს ბითლზის მომღერლების ხმები, შემდეგ კი ინსტრუმენტებისგან და უკანა ფონის ხმაურისგან გააცალკევოს, რითაც "სუფთა ჩანაწერს" იღებენ. ამ ტექნოლოგიიამ მაკარტნის საშუალება მისცა ახალ სიმღერაში ლენონთან "დუეტი ჩაეწერა".

"გვქონდა ჯონის ხმა და მისი ფორტეპიანო, ხელოვნური ინტელექტის საშუალებით კი მათი გაცალკევება შევძელით. მოწყობილობას ეუბნებიან: 'ეს არის ხმა, ეს არის გიტარა, წაშალე გიტარა'", — აღნიშნავს მუსიკოსი.

მაკარტნი მუსიკის მომავალზეც საუბრობს და ამბობს, რომ ზოგჯერ ადამიანები ეუბნებიან, როგორ ნახეს ჩანაწერი, რომელშიც ჯონ ლენონი მაკარტნის ახალ სიმღერას მღერის, სინამდვილეში კი ეს მხოლოდ ხელოვნური ინტელექტია, რაც მას აშინებს.

"ეს საშიში პროცესია, მაგრამ ასევე ამაღელვებელი. ესაა მომავალი. უბრალოდ უნდა ვნახოთ, სად მიგვიყვანს", — ამბობს მაკარტნი.

იხილეთ ასევე:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...