ცელნამგალა ვეშაპი, სახელად ტოკიტე, წყნარი ოკეანის ჩრდილოაღმოსავლეთ წყლებში ნახევარ საუკუნეზე მეტი ხნის წინ დაიჭირეს და მას შემდეგ ის მაიამის ზღვის აკვარიუმის ტყვე გახდა. თუმცა, ცხოველთა უფლებადამცველების მრავალწლიანმა ძალისხმევამ შედეგი გამოიღო — ტოკიტე მალე გათავისუფლდება და მშობლიურ საბინადროს დაუბრუნდება. გავრცელებული ცნობით, ვეშაპის გადაყვანა ოკეანეში მომდევნო 18-დან 24 თვემდე პერიოდში მოხერხდება.

აღსანიშნავია, რომ ტოკიტე ყველაზე ხანდაზმული დატყვევებული ცელნამგალა ვეშაპია. წლების განმავლობაში მას მაიამის ზღვის აკვარიუმში ვიზიტორების გასართობად იყენებდნენ. როგორც ცნობილია, ის ჩრდილოეთ ამერიკაში ვეშაპების ყველაზე მომცრო სათავსოში ცხოვრობდა — იმდენად პატარაში, რომ კანის დაავადებაც გაუჩნდა. ამასთან, ცხოველს ხშირად გახრწნილი თევზითაც კვებავდნენ, რამაც ასევე მიაყენა ტოკიტეს ზიანი.

წლების განმავლობაში ვეშაპის გათავისუფლებას არაერთი ჯგუფი მოითხოვდა, მათ შორის, დაწესებულებასთან საპროტესტო აქციების გამართვით.

როგორც ვთქვით, ტოკიტე 50 წელზე მეტი ხნის წინ დაიჭირეს ვაშინგტონის შტატის სანაპიროს მიმდებარე წყლებში. ზღვის ცხოველების დაჭერას მაშინ ათობით ცელნამგალა ვეშაპი ემსხვერპლა, 50-ზე მეტი კი ტყვეობაში აღმოჩნდა. ერთ-ერთი მათგანი გახლდათ 4 წლის ტოკიტეც, რომელიც დედას დააშორეს.

აღსანიშნავია, რომ ცელნამგალა ვეშაპებს ვაშინგტონის შტატის ადგილობრივი ტომი თავისი დიდი ოჯახის ნაწილად მიიჩნევს, ამდენად, ბრძოლა ტოკიტეს გასათავისუფლებლად არც მათ შეუწყვეტიათ.

ფოტო: Nuri Vallbona / AP

ფიქრობენ, რომ ცხოველის ნათესავები, მათ შორის 90 წლის დედა, წყნარი ოკეანის წყლებში ჯერ ისევ ცოცხლები არიან. თუმცა, ექსპერტებს აშფოთებთ, რომ დაავადებები, რომლებიც ტოკიტეს ტყვეობაში გაუჩნდა, შესაძლოა, ოკეანის სხვა ბინადრებში გავრცელდეს — მით უმეტეს, რომ ცელნამგალა ვეშაპი ისედაც საფრთხის ქვეშ მყოფ სახეობად მიიჩნევა. გარდა ამისა, შინ დასაბრუნებლად გასავლელმა გზამ და ახალმა საცხოვრებელმა გარემომ ხანდაზმულ ვეშაპზე შეიძლება ცუდად იმოქმედოს.

ამ ყველაფრის მიუხედავად, ცხოველთა უფლებადამცველები მიღებულ გადაწყვეტილებას მაინც ისტორიული მნიშვნელობის მიღწევად მიიჩნევენ, რადგან მომხდარი სკეპტიკოსებსაც შეუცვლის შეხედულებას.