დღეს ქართული ოცნების თავმჯდომარე მედიასთან კომენტარზე იდგა და მმართველი გუნდის ახალი ნარატივები და მესიჯბოქსები გააჟღერა, რომელიც მანამდე პრემიერმინისტრისგან მოვისმინეთ. იყო სიახლეც — გვიმტკიცებდა, თითქოს ევროპისთვის სპეცრაზმის მიერ მომიტინგეების წინააღმდეგ გამოყენებული ძალა და მეთოდები მისაღები იყო.

კობახიძის თქმით, 2012 წლამდე სპეცრაზმი ძალადობდა მომიტინგეებზე, ხოლო ახლა მომიტინგეები ძალადობდნენ სპეცრაზმზე — ამაზე საუბრისას მას არ უხსენებია, რომ სპეცდანიშნულების რაზმები ფიზიკურად უსწორდებოდნენ წაქცეულ მოქალაქეებს და თავს ესხმოდნენ ჟურნალისტებს, ხოლო ცრემლსადენ გაზსა და წყლის ჭავლს მშვიდობიანი დემონსტრანტები წინააღმდეგ იყენებდნენ.

• "გასულ კვირაში, სპეცრაზმისა და მომიტინგეების ურთიერთდაპირისპირებაში ევროპა იყო არა მომიტინგეების, არამედ სპეცრაზმის მხარეს. კიდევ ერთხელ ვუხდით მადლობას თითოეულ პოლიციელს და სამართალდამცავებს, პირადად შინაგან საქმეთა მინისტრ ვახტანგ გომელაურს ამისათვის", — თქვა მან.

რატომ არის მნიშვნელოვანი: უცნაურია, რაზე დაყრდნობით ამბობს ამას კობახიძე, როცა პარტნიორები და ევროპელი ლიდერები სულ სხვა რამეს ამბობდნენ.

• მაგალითად, აშშ-ის სახელმწიფო დეპარტამენტის პრესსპიკერმა, ნედ პრაისმა არა ერთხელ დაგმო რუსული კანონის მიღებასთან დაკავშირებული პროცესები და თქვა, რომ ხალხი ხმამაღლა აფიქსირებდა თავის აზრს, რომელსაც ცრემლსადენი გაზით და სხვა საშუალებებით ახშობდნენ.
• მან მოუწოდა მთავრობას, რომ პატივი ეცათ მშვიდობიანი პროტესტის უფლებისთვის.
• ევროკავშირის უმაღლესი წარმომაგენელი, ჯოზეფ ბორელი ამბობდა, რომ ქართველები გამოვიდნენ ქუჩებში დემოკრატიისა და ევროპული ღირებულებებისკენ სწრაფვის გამოსახატავად და ეს მშვიდობიანი პროტესტი ძლიერი და თვალსაჩინო იყო.
• ესტონეთის პრემიერმინისტრი წერდა, რომ შეშფოთებულია მშვიდობიანი მომიტინგეების მიმართ ძალადობის კადრებით.

კიდევ რამდენიმე მაგალითი: სენატორები აღნიშნავდნენ, რომ ქუჩაში გამოსული ქართველი ხალხი ნათლად ხედავდა ყველაფერს და მოუწოდებდნენ მთავრობას, საშუალება მიეცათ მოქალაქეებისთვის, მშვიდად გამოეხატათ პროტესტი.

• აშშ-ის ელჩი ამბობდა, რომ ქართველმა ხალხმა, განსაკუთრებით სტუდენტებმა და ახალგაზრდებმა ხმამაღლა და გარკვევით თქვეს თავისი სათქმელი და ბოლოს და ბოლოს მმართველმა პარტიამ მათ მოუსმინა.
• ბრიტანეთის საელჩო მოუწოდებდა მთავრობას, გაეთვალისწინებინა სამოქალაქო საზოგადოების, დამოუკიდებელი მედიის და საერთაშორისო პარტნიორების წუხილი.
• ლიტვის ყოფილი საგარეო საქმეთა მინისტრი, ლინას ლინკევიჩუსი წერდა, რომ სამოქალაქო საზოგადოებამ აჩვენა თავისი ძალა და პატივისცემას იმსახურებს.
• საფრანგეთის პრეზიდენტმა კი კანონის ჩაგდების შემდეგ დაწერა, რომ გაგონილია ქართველების ერთგულება დემოკრატიული ღირებულებების, პრესის, თავისუფლების მიმართ და ევროპისკენ შეტრიალებულმა საქართველომ იცის, რომ შეუძლია საფრანგეთის მეგობრობის იმედი ჰქონდეს.
• ნამდვილად არაფერი ბადებს ეჭვს, რომ ევროპისკენ მიტრიალებულ საქართველოში მაკრონი სპეცრაზმს გულისხმობს.