სამხრეთ კორეაში ასაკის დათვლის ტრადიციული მეთოდი უქმდება. ქვეყანა ამიერიდან მოქალაქეების ასაკს საერთაშორისო სტანდარტით დაითვლის, რის გამოც სამხრეთ კორეელების უმეტესობას ახლანდელ ასაკზე 1-2 წელი დააკლდება.

აქამდე სამხრეთ კორეელებს დაბადებისთანავე 1 წელი ენიჭებოდათ და ყოველი წლის პირველ იანვარს კიდევ ერთი წელი ემატებოდათ. ამ უჩვეულო მეთოდის მიხედვით, 31 დეკემბერს დაბადებული ბავშვი ახალი წლის დადგომისთანავე 2 წლის ხდებოდა.

ასაკის დათვლის ტრადიციულ მეთოდს აქამდეც ბევრი პოლიტიკოსი აკრიტიკებდა. ისინი ამბობდნენ, რომ სამხრეთ კორეა, რომელიც აზიაში ეკონომიკით, ტექნოლოგიური მიღწევებითა და კულტურით გამოირჩევა, დროში ჩამორჩენილს ჰგავდა.

სამხრეთ კორეელების უმეტესობას ასაკის დათვლასთან დაკავშირებული ცვლილება მოსწონს. "მახსოვს, უცხოელებს როგორ უკვირდათ, როცა იმაზე პასუხის გასაცემად დიდი დრო მჭირდებოდა, თუ რამდენი წლის ვარ. ვის არ უნდა 1-2 წლით უმცროსი იყოს", —ამბობს 29 წლის სამხრეთ კორეელი ქალი.

"ორი წლით ვახალგაზრდავდები და ძალიან ბედნიერი ვარ. დეკემბერში დავიბადე და მაშინვე 2 წლის გავხდი. როგორც იქნა, ჩემს რეალურ ასაკს დავიბრუნებ", — წერს ტვიტერზე ერთ-ერთი სამხრეთ კორეელი.

სამხრეთ კორეის მთავრობამ ასაკის დათვლის სტანდარტის ცვლილება იყო უკვე მიიღო, კანონი კი ძალაში 2023 წლის ივნისში შევა.