აზერბაიჯანის პრეზიდენტმა, ილჰამ ალიევმა, დღეს, 31 მაისს თავისი ქვეყნის, როგორც ენერგო გიგანტის მნიშვნელობას ზუსტად რვა ტვიტში, კიდევ ერთხელ გაუსვა ხაზი. ალიევი წერს, რომ აზერბაიჯანი განვითარებული ქვეყანაა, რომელიც უდიდესი ინფრასტრუქტურული პროექტებს ახორციელებს, ასევე, სანდო პარტნიორი და რეგიონში უსაფრთხოების გარანტია.

"კასპიის ნავთობისა და გაზის 2017 წლის 24-ე გამოფენა მიუთითებს, რომ აზერბაიჯანი მთელს მსოფლიოში აღიარებულია, როგორც სანდო პარტნიორი."

"უცხოელ ინვესტორებთან ენერგეტიკისა და სხვა სფეროებში ურთიერთსასარგებლო ურთიერთობებით, აზერბაიჯანმა შექმნა მშვენიერი პარტნიორული ფორმატები."

"აზერბაიჯანი არის დამოუკიდებელი ქვეყანა ძლიერი ეკონომიკითა და ფინანსური რესურსებით, რომელიც თვითმყოფადია და საკუთარი პოზიციების დაცვა შეუძლია."

"საუკუნის კონტრაქტის პროექტმა, რომელსაც ხელი 1994 წელს მოეწერა, განსაკუთრებული როლი ითამაშა აზერბაიჯანის სახელმწიფოს განვითარებაში."

"შაჰდენიზის პროექტის განხორციელებამ აზერბაიჯანი ნავთობისა და გაზის მწარმოებლად და ექსპორტიორ ქვეყნად აქცია."

"ბუნებრივი აირის სამხრეთის დერეფანი გლობალური მასშტაბით უნიკალური პროექტია, ის ასევე პირველია ევროპის ინფრასტრუქტურულ პროექტებს შორის."

"აზერბაიჯანმა უზრუნველყო საკუთარი ენერგოუსაფრთხოება და ასევე, თამაშობს მნიშვნელოვან როლს მეგობრული და პარტნიორი ქვეყნების ენერგოუსაფრთხოებაში."

"აზერბაიჯანის ნავთობისა და გაზის პროექტები არის უსაფრთხოების, სტაბილურობისა და განვითარების გარანტორი რეგიონში."

29 მაისს, თბილისიდან გაიტაცეს აფგან მუხტარლი, აზერბაიჯანის ხელისუფლების მიერ დევნილი ჟურნალისტი, რომელიც თავს თბილისს აფარებდა ოჯახთან ერთად. მისი ცოლის, ლეილა მუსტაფაევას თქმით, აფგანი თბილისში, სოლოლაკის ტერიტორიიდან გაუჩინარდა, მოგვიანებით კი აღმოჩნდა, რომ ის აზერბაიჯანშია დაპატიმრებული. მუსტაფაევას აინტერესებს, როგორ გადაკვეთა მუხტარლიმ საქართველო-აზერბაიჯანის საზღვარი მაშინ, როცა მისი პასპორტი თბილისში, სახლში ჰქონდა დატოვებული. თავად მუხტარლიმ აზერბაიჯანში ადვოკატს უთხრა, რომ ის ნაცემია. დღეს, 31 მაისს, აზერბაიჯანის სასამართლომ აფგან მუხტარლის სამთვიანი წინასწარი პატიმრობა შეუფარდა.

საქართველოს შინაგან საქმეთა სამინისტრო ამბობს, რომ მათ გამოძიება ადამიანის თავისუფლების უკანონოდ აღკვეთის მუხლით დაიწყეს, თუმცა, ჯერ არ განუმარტავთ, როგორ აღმოჩნდა თბილისში დაკარგული ჟურნალისტი ბაქოს ციხეში. აფგან მუხტარლში ჯერ კიდევ რამდენიმე დღის წინ ამბობდა, რომ აზერბაიჯანის ხელისუფლების მიერ დევნილ პირებს საქართველოში საფრთხე ემუქრებათ, რადგან მათ თავშესაფარს არ აძლევენ და უკან, აზერბაიჯანში აბრუნებენ, სადაც წამება და მრავალწლიანი პატიმრობა ელოდებათ.