პარტიები გირჩი — მეტი თავისუფლება, დროა და სტრატეგია აღმაშენებელი ერთობლივ განცხადებას ავრცელებს.

რატომ არის მნიშვნელოვანი: სამი ოპოზიციური პარტია ერთობლივ თანამშრომლობაზე შეთანხმდა. მათი განცხადებით, ქართული ოცნების დამარცხების ერთადერთი გზა დიდი ერთობაა საქართველოს ევროპული მომავლის გარშემო.

  • IRI-ის კვლევის მიხედვით, გირჩი — მეტი თავისუფლებას 3% უჭერს მხარს, დროს და სტრატეგია აღმაშენებელს კი 2-2%.
  • ქართულ ოცნებას მხარს გამოკითხულთა 25% უჭერს, ერთიან ნაციონალურ მოძრაობას კი — 12%.

დეტალები: პარტიების განცხადებით, მიუხედავად იმისა, რომ ერთად ოპოზიციურ პარტიებს აქვთ მეტი პროცენტული მხარდაჭერა და ქართული ოცნების რეიტინგი დაბალია ჯამურად ოპოზიციის რეიტინგზე, "ივანიშვილის რეჟიმის უზარმაზარი ფინანსური რესურსების არჩევნების გაყალბების და ძალადობის მრავალწლიანი გამოცდილების გათვალისწინებით, ცალკე აღებულ არცერთ ოპოზიციურ პარტიას არ შესწევს მისი დამარცხების უნარი".

  • ზურაბ ჯაფარიძე, ელენე ხოშტარია და გიორგი ვაშაძე წერს, რომ მათ პარტიებს კონსოლიდაციის შემთხვევაში ბარიერის გადალახვის პრობლემა არ ექნებათ.
  • "ეს კვლევაც ამას აჩვენებს, მაგრამ ეს არ არის საკმარისი ანტიდასავლური და, შესაბამისად, პრორუსული რეჟიმის დასამარცხებლად. საჭიროა ჯერ კიდევ "ცოცხალი" იმ ოპოზიციური პარტიების სრულად გაერთიანება, რომლებიც არ თანამშრომლობენ ქართულ ოცნებასთან და არ ატყუებენ ქვეყნის მოსახლეობას რომ ასეთი თანამშრომლობით შესაძლებელია ევროკავშირის წევრობის კანდიდატის სტატუსის მიღება მომავალი წლის ბოლოს", — წერენ ისინი.

გარდა ამისა, პარტიები აცხადებენ, რომ პარტიული ინტერესებით მოქმედი ვერც ერთი ოპოზიციური პარტია ვერ ახერხებს შესთავაზოს გამოსავალი მოსახლეობას.

  • "ერთადერთი გამოსავალი ოპოზიციური ფლანგის სწრაფი კონსოლიდაციაა. წინასაარჩევნოდ, 3 ან 4 თვით ადრე ხელოვნური გაერთიანება, გამოიწვევს პროცესისადმი უნდობლობას და ივანიშვილის მმართველობის გახანგრძლივებას".
  • "სინამდვილეში, არანაირი კვლევა არაა საჭირო იმისთვის, რომ დავინახოთ სად ვართ. საკმარისია გავესაუბროთ ქუჩაში გამვლელებს.
  • მოსახლეობის უდიდესი ნაწილი, ისევე როგორც ჩვენი ქვეყნის მეგობრები დასავლეთში, ჩვენგან ელოდებიან ერთობას, პირადი ინტერესების გვერდზე გადადებას, პასუხისმგებლობის აღებას და ხელისუფლების ცვლილებას.
  • ერთობა, ეს არის ფორმულა, რომელიც ამარცხებს პრორუსულ რეჟიმს, აერთიანებს მოსახლეობის აბსოლუტურ უმრავლესობას და გარანტირებულად მოაპოვებინებს ქვეყანას კანდიდატის სტატუსს".