ნიუ-მექსიკოს ერთ-ერთი ქალაქის აუქციონზე 1880-იან წლებში შეკერილი Levi's-ის ჯინსები 87 400 დოლარად გაიყიდა. ჯინსი, რომელიც ერთ-ერთ მოტოვებულ მაღაროში იპოვეს, ვინტაჟური ჯინსების ბაზრობაზე ძალიან მაღალ ფასად გაიყიდა.

87 400 ერთ-ერთი ყველაზე მაღალი ფასია, რომელიც ოდესმე ჯინსებში გადაუხდიათ. ჯინსები იმ ადამიანმა შეიძინა, რომელსაც ლოს-ანჯელესში ჯინსების სამკერვალო აქვს და დაზიანებული ჯინსებიც ხშირად გადაუკეთებია.

"ჯინსების ეს მოდელი ძალიან იშვიათია, თუ მის მდგომარეობასა და ზომას გავითვალისწინებთ", — განაცხადა ჯინსების ახალმა მფლობელმა.

87 400 დოლარად გაყიდული Levi's-ის ჯინსების იდენტური მოდელები ჯერ კიდევ შემორჩენილია, თუმცა ისინი მუზეუმში ინახება და საკმაოდ დაზიანებულიცაა.

"ჩემ მიერ შეძენილი ჯინსი ძალიან გამძლეა და მისი ჩაცმაც შესაძლებელია. მართალია, ჯინსზე რამდენიმე ლაქაა, მაგრამ სხვა მხრივ კარგ მდგომარეობაშია. მარტივად შემიძლია წარმოვიდგინო, თუ როგორ აცვია ეს ჯინსი ჯონი დეპს ან ჯეისონ მომოას", — ამბობს Levi's-ის ჯინსების ახალი მეპატრონე.