რიგ შემთხვევებში, საქართველოში დასაქმებულ ლგბტ (ლესბი, გეი, ბისექსუალი, ტრანსსექსუალი) დასაქმებულ პირებს სამსახურში ისეთ პირობებს უქმნიან, რომ ისინი იძულებულნი არიან, საკუთარი ნებით უარი თქვან სამსახურზე. ამის შესახებ წერია კვლევაში, რომელიც ქალთა ინიციატივების მხარდამჭერმა ჯგუფმა (WISG) NED-ის ფინანსური მხარდაჭერით ჩაატარა.

"მიუხედავად იმისა, რომ საკანონმდებლო დონეზე, დასაქმების სფეროში დისკრიმინაცია აკრძალულია, სხვადასხვა, მათ შორის სექსუალური ორიენტაციის საფუძველზე, შრომითი დავები ამ საფუძვლით არ მიმდინარეობს", - წერს WISG. ორგანიზაციის განცხადებით, მათ კვლევის ფარგლებში ინფორმაცია გამოითხოვეს ყველა ინსტანციის სასამართლოდან, თუმცა, როგორც აღმოჩნდა, სასამართლოებს აღნიშნული საფუძვლით შრომითი დავები განხილული საერთოდ არ აქვთ, ან არ აწარმოებენ მსგავს სტატისტიკას.

სამუშაო ადგილზე ლგბტ პირები ყველაზე ხშირად ხდებიან დისკრიმინაციის მსხვერპლი, ასეთ დროს განსაკუთრებით დაუცველები არიან ტრანსგენდერები

ქალთა ინიციატივების მხარდამჭერი ჯგუფის კვლევაში ასევე აღნიშნულია, რომ სამუშაო ადგილზე ლგბტ პირები ყველაზე ხშირად ხდებიან დისკრიმინაციის მსხვერპლი, ასეთ დროს განსაკუთრებით დაუცველები არიან ტრანსგენდერები. ორგანიზაცია ოფიციალური სტატისტიკის არარსებობას ამ მიმართულებით უკავშირებს თავად ლგბტ თემის წევრთა პასიურობას, რომლებსაც არ აქვთ ინფორმაცია სამართლებრივი დაცვის რა ბერკეტები აქვთ, გარდა ამისა, საქმეები სასამართლომდე არც მიდის. ხშირად, მათ ისეთ პირობებს უქმნიან, რომ იძულებულნი არიან, დატოვონ სამსახური.

ჰაინრიხ ბიოლის ფონდმა ევროკავშირის ფინანსური მხარდაჭერით 3 წლიანი პროექტი დაიწყო, რომელიც საქართველოსა და სომხეთში ჰომოფობიური განწყობების გაქრობას, საზოგადოებაში ცნობიერების ამაღლებასა და ლგბტ ადამიანებისთვის საზოგადოებაში სრულფასოვან ჩართვას ისახავს მიზნად.

პროექტის ფარგლებში ქალთა ინიციატივების მხარდამჭერმა ჯგუფმა (WISG) ჩაატარა კვლევა, რომელშიც მონაწილეობა მიიღო 2,000-მა რესპონდენტმა საქართველოს მასშტაბით.

პროექტის პარტნიორები არიან: ქალთა ინიციატივების მხარდამჭერი ჯგუფი (WISG) და ადამიანის უფლებების სწავლებისა და მონიტორინგის ცენტრი (EMC) საქართველოში და საზოგადოება ძალადობის გარეშე (SWV) და საჯარო ინფორმირება და ცოდნის აუცილებლობა (PINK) სომხეთი.