სილვესტერ სტალონე და ჯენიფერ ფლავინი 25 წლის განმავლობაში იყვნენ დაქორწინებული, თუმცა ცოტა ხნის წინ ჯენიფერმა განაცხადა, რომ წყვილი განქორწინებას აპირებს:

"მწუხარებით გატყობინებთ, რომ 25-წლიანი ქორწინების შემდეგ ჩემი ქმრისგან, სილვესტერ სტალონესგან განქორწინება მოვითხოვე. დაქორწინებულები აღარ ვიქნებით, მაგრამ ყოველთვის დავაფასებ ჩვენს 30-წლიან ურთიერთობას და ვიცი, რომ ორივე ვიზრუნებთ ჩვენს მშვენიერ შვილებზე", — განაცხადა მან.

განქორწინების შესახებ განცხადების გაკეთებამდე რამდენიმე დღით ადრე სტალონემ მხარზე ცოლის უზარმაზარი ტატუ გადაიკეთა. ცოლის მაგივრად სტალონეს მხარზე თავისი საყვარელი ძაღლის, ბუტკუსის ტატუ აქვს. ბუტკუსი შესაძლოა Rocky-ის ფილმებიდან გახსოვდეთ.

ფოტო: United Artists / Getty Images

მალე ჭორიც კი გავრცელდა, რომ წყვილის დაშორების მიზეზი ძაღლი გახდა, თუმცა სილვესტერმა ეს უარყო და თქვა, რომ ასეთი პატარა მიზეზის გამო ერთმანეთს არ დაუპირისპირდებოდნენ. ამის შემდეგ კი სტალონეს წარმომადგენელმა მედიებს განუცხადა, რომ ტატუს გადაკეთების მიზეზი მხოლოდ ის იყო, რომ მის გასაახლებლად სალონში მისულ სტალონეს შედეგი არ მოსწონებია და შეცდომის გადაკეთება გადაწყვიტა.

"ბატონ სტალონეს თავისი ცოლის, ჯენიფერის ტატუს განახლება უნდოდა, თუმცა შედეგი არ მოეწონა და მისი გამოსწორებაც შეუძლებელი იყო. ამიტომ გადაწყვიტა, რომ თავდაპირველი ტატუ Rocky-დან ძაღლის, ბუტკუსის ტატუთი გადაეფარა", — განაცხადა მსახიობის წარმომადგენელმა.

რაც არ უნდა ყოფილიყო მიზეზი, ტატუს გადაკეთება ნამდვილად სასაცილო აღმოჩნდა!