მოსკოვის ყოფილი მერი, იური ლუჟკოვი საკუთარ თავს თბილისის საპატიო მოქალაქეს უწოდებს და სექტემბერში დაბრუნებასაც გეგმავს. როგორც ლუჟკოვმა რია ნოვოსტის უთხრა, ის თავის დროზე დანგრეული პირველი სკოლის აღდგენაში დაეხმარა. მისივე თქმით, საქართველოს მოქალაქეებს ეს ახსოვთ და მოგზაურობის დროს მათი დამოკიდებულება ძალიან თბილი და მეგობრული იყო.

მოსკოვის ყოფილი მერი, ასევე, სექტემბერში საქართველოს მონახულების სურვილს გამოთქვამს, რადგან მეგობრის შვილიშვილის ქორწილშია დაპატიჟებული. ლუჟკოვის აზრით, მისი შავ სიაში შეყვანის გადაწყვეტილება არაგონივრული და გაუგებარია:

"ეს არის ბატონი სააკაშვილის ანასხლეტი. ვერც კი ვიჯერებ, რომ ასეთი გადაწყვეტილების მიღება შეუძლიათ."

ლუჟკოვი იმედოვნებს, რომ საქართველოს ხელისუფლება არ მიიღებს "ველურ გადაწყვეტილებას."

მოსკოვის ყოფილი მერი იური ლუჟკოვი საქართველოში ოთხი დღის განმავლობაში იმყოფებოდა. ლუჟკოვს დარღვეული აქვს საქართველოს კანონი ოკუპაციის შესახებ და ის საქართველოს ოკუპირებულ რეგიონებში რუსეთის მხრიდანაა ნამყოფი, თუმცა მან საზღვარი უპრობლემოდ გადმოკვეთა. შს მინისტრის მოადგილის, შალვა ხუციშვილის თქმით, იური ლუჟკოვი ე.წ. შავ სიაში იქნება შეყვანილი და ის საქართველოში ვეღარ შემოვა.