საფრანგეთის პრეზიდენტობის კანდიდატის, ემანუელ მაკრონის კომპიუტერი და ელექტრონული ფოსტა გატეხეს, რამაც ჰაკერებს მისი მიმოწერის მოპოვების შესაძლებლობა მისცა. მაკრონმა უკვე აღიარა, რომ არჩევნების მეორე ტურამდე ერთი დღით ადრე, მის მიმართ კიბერ შეტევა განხორციელდა. ინფორმაციას როიტერსი ავრცელებს.

9 გიგაბაიტის მოცულობის მასალა, სახელად EMLEAKS, ერთ-ერთ ფრანგულ საიტზე (Pastebin) გამოქვეყნდა. ამ საიტის მეშვეობით ანონიმური და პირადი დოკუმენტების გაზიარება ხდება. უცნობია, ვინ არის პასუხისმგებელი ამ მასალის გამოქვეყნებაზე ან, არის თუ არა ის ნამდვილი.

მოგვიანებით, მაკრონის პოლიტიკურმა მოძრაობამ დაადასტურა, რომ საპრეზიდენტო კანდიდატის ონლაინ მონაცემები გატეხეს.

საფრანგეთის შინაგან საქმეთა მინისტრმა აღნიშნულზე კომენტარი არ გააკეთა, რადგან მისი თქმით, საფრანგეთის კანონმდებლობა მას უკრძალავს ნებისმიერ განცხადებას არჩევნების წინ, მასზე გავლენის მოხდენის თავიდან არიდების მიზნით.

საპრეზიდენტო არჩევნების კომისიამ მედიას მოუწოდა, რომ აღნიშნული თემის გაშუქებისას სიფრთხილე გამოიჩინოს და დეტალების გახმაურებისგან თავი შეიკავოს კამპანიის დასრულებამდე, წინააღმდეგ შემთხვევაში, ეს შესაძლოა სასამართლო დავის საბაბი გახდეს.

მაკრონის იმეილების გატეხვის შესახებ ინფორმაცია პარასკევს საღამოს გავრცელდა, რამდენიმე საათით ადრე, ვიდრე საარჩევნო კამპანია ქვეყნის მასშტაბით აიკრძალებოდა.

აშშ-ის გამოძიების ფედერალურმა ბიურომ (FBI) ამერიკის საპრეზიდენტო არჩევნებამდე რამდენიმე დღით ადრე ხელახლა დაიწყო ჰილარი კლინტონის "იმეილების საქმის" გამოძიება. ამის საფუძველი კი გახდა FBI-ის გამომძიებლების მიერ აღმოჩენილი ახალი ელექტრონული შეტყობინებები, რომელიც აშშ-ს პრეზიდენტობის კანდიდატს სახელმწიფო მდივნის პოსტზე მუშაობისას, პერსონალური სერვერიდან აქვს გაგზავნილი.

2016 წლის 7 ნომებერს, არჩევნების წინა დღეს, გამოძიების დირექტორის ჯეიმს კომიმ განაცხადა, რომ ე.წ. იმეილების საქმეში ჰილარის დანაშაული არ იკვეთებოდა. კომიმ განცხადება დემოკრატიული პარტიის წინასაარჩევნო კამპანიის შეწყვეტამდე სულ მცირე დროით გაავრცელა.

ჰილარი კლინტონი არჩევნებში დამარცხებას სწორედ FBI-ის დირექტორს აბრალებს და აცხადებს, რომ არჩევნების დღემდე ცოტა ხნით ადრე, FBI საარჩევნო პროცესში მისთვის ნეგატიურად ჩაერია.