საქართველოს ფინანსთა სამინისტროს საგამოძიებო სამსახურში ამბობენ, რომ სახელმწიფო უსაფრთხოების სამსახურთან ერთობლივად გატარებული საგამოძიებო და ოპერატიული მოქმედებების შედეგად, სატელეფონო კომუნიკაციების სფეროში ჩადენილი მორიგი, საერთაშორისო დანაშაული გახსნეს.

საგამოძიებო სამსახურში აცხადებენ, რომ გამოძიებით თბილისსა და ბათუმში რვა მოწყობილობა აღმოაჩინეს, რომელითაც საერთაშორისო ზარები ადგილობრივ ზარებად გარდაიქმნებოდა.

"დანაშაულებრივი ჯგუფის წევრები, უცხოური ზარის ადგილობრივ ზარად გარდაქმნის შედეგად, ხელოვნურად ცვლიდნენ შემომავალი ზარების ტარიფებს და მნიშვნელოვნად აზარალებდნენ სახელმწიფო ბიუჯეტს და სატელეფონო კომუნიკაციების სფეროში მომუშავე კომპანიებს," - აცხადებენ უწყებაში.

საქმეზე გამოძიება "სისხლის სამართლის კოდექსის" 185-ე (ქონების დაზიანება მოტყუებით), 192-ე (უკანონო სამეწარმეო საქმიანობა) და 218-ე (გადასახადისთვის თავის არიდება მუხლებით მიმდინარეობს. ამ დანაშაულებისთვის რვა წლამდე თავისუფლების აღკვეთაა გათვალისწინებული.