უკრაინის ვიცე-პრემიერის, ირინა ვერეშჩუკის განცხადებით, აზოვსტალიდან მშვიდობიანი მოქალაქეების ევაკუაციაზე შეთანხმება არ არსებობს. ასე ეხმაურება ის რუსეთის თავდაცვის სამინისტროს განცხადებას, რომ ტერიტორიიდან მოქალაქეების გასაყვანად სამხედრო მოქმედებებს შეაჩერებენ.

"ამის დაჯერება შესაძლებელი იქნებოდა, რუსეთს აქამდე არაერთხელ რომ არ გაეტეხათ ჰუმანიტარულ დერეფნებზე შეთანხმება. ვიცი, რასაც ვამბობ, რადგან პრეზიდენტის სახელით პირადად ვაწარმოებ მსგავს მოლაპარაკებებს და ვაორგანიზებ ჰუმანიტარულ დერეფნებს. მნიშვნელოვანია გვესმოდეს, რომ ჰუმანიტარული დერეფნები ორივე მხარის შეთანხმებით იხსნება.

ცალმხრივად გამოცხადებული დერეფნები არ უზრუნველყოფს უსაფრთხოებას და შესაბამისად, ფაქტობრივად, არ არის ჰუმანიტარული დერეფანი. ასე რომ, ოფიციალურად და საჯაროდ ვაცხადებ: სამწუხაროდ, დღეს აზოვსტალზე ჰუმანიტარული დერეფნების შესახებ შეთანხმება არ არსებობს", — განაცხადა მან.

დღეს, 25 აპრილს რუსეთის თავდაცვის სამინისტრომ განაცხადა, რომ საომარ მოქმედებებს შეაჩერებენ, რათა მშვიდობიანმა მოქალაქეებმა ალყაში მოქცეული აზოვსტალის ქარხანა დატოვონ. უწყება ამბობს, რომ აზოვსტალის ტერიტორიაზე ჩარჩენილ მოქალაქეებს ქარხნის დატოვება ნებისმიერი მიმართულებით შეეძლებათ.