რუსეთის უკრაინაში შეჭრის შემდეგ უკრაინული ზოოპარკებიდან ცხოველები პოლონეთის ტერიტორიაზე გადაჰყავთ. პოლონეთის ქალაქ პოზნანის ზოოპარკის წარმომადგენლები აცხადებენ, რომ მათი თანამშრომლები ცხოველების ქვეყანაში ჩასვლას საზღვართან ელოდებიან.

ადმინისტრაციის თქმით, ცხოველების უსაფრთხოდ ჩასვლის მაშინ იმედი დაკარგეს, როცა შეიტყვეს, რომ კოლონა, რომელსაც უკრაინული ზოოპარკის ბინადრები გადაჰყავდა, რუსული ტანკების გარემოცვაში აღმოჩნდა.

"მთელი ღამე სიახლის მოლოდინში გავატარეთ და ყველაზე საშინელი სცენარის გვეშინოდა. დღეს კი სასწაული მოხდა", — წერია ზოოპარკის განცხადებაში, — "ისინი ჩვენკენ მოდიან. მათი უსაფრთხოებიდან გამომდინარე, მეტ დეტალს ვერ გაგიზიარებთ".

უკრაინაში შექმნილი საომარი სიტუაციის გამო, ბოლო დღეების განმავლობაში არაერთ ზოოპარკსა და ცხოველთა თავშესაფარს შეექმნა პრობლემა, რადგან ისინი საკვებითა და სხვა საჭიროებებით მომარაგებას ვეღარ ახერხებენ.

პოზნანის ზოოპარკი უკრაინელ პარტნიორებთან თანამშრომლობს, რათა, რაც შეიძლება, მეტი ცხოველის ევაკუირება მოხერხდეს. მათი თქმით, როგორც კი კიევიდან გამგზავრებული ცხოველები ქვეყანაში ჩავლენ, ლვივის ზოოპარკისთვის საკვებისა და სხვა საჭიროებების გაგზავნას შეუდგებიან.

კიევის ზოოპარკის განცხადებით, ქვეყანაში შექმნილმა სიტუაციამ მათ ბინადრებსაც შეუქმნა დისკომფორტი, თუმცა, პირობები ჯერჯერობით უცვლელია.

"ზოოპარკი ვიზიტორებისთვის დაკეტილია, თუმცა, ცხოველებზე ზრუნვა არ შეგვიწყვეტია", — აღნიშნავენ ისინი, — "ომი ცხოველებს საშინლად სტრესავს, ამიტომ ზოგიერთი მათგანი დახურულ და მიწისქვეშა ვოლიერებში გადავიყვანეთ. ვეტერინარები მუდმივად ადევნებენ თვალყურს მათ ემოციურ მდგომარეობას და საჭიროების შემთხვევაში დამამშვიდებელ საშუალებასაც აძლევენ".

საბედნიეროდ, ამ დრომდე ზოოპარკი ყველა საჭირო რესურსით, ელექტროენერგიით, წყლით, საკვებითა და გათბობით არის უზრუნველყოფილი.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში

ასევე იხილეთ: