საქართველოს პრეზიდენტმა, სალომე ზურაბიშვილმა France 24-თან ირაკლი ღარიბაშვილის განცხადებაზე დასმულ კითხვაზე თქვა, რომ ის მსგავს განცხადებას არ გააკეთებდა.

"არ ვფიქრობ, რომ ასეთ განცხადებას რაიმე აზრი აქვს დღეს და მე არ გავაკეთებდი მსგავს განცხადებას, შემიძლია ამის გულწრფელად თქმა. ვფიქრობ, რომ ის, რაც დღეს მნიშვნელოვანია და ყველა ელოდება საქართველოსგან, არის ღია სოლიდარობა", — განაცხადა პრეზიდენტმა.

მისივე თქმით, 2008 წელს რუსეთის საქართველოში შემოჭრას არ შეუცვლია ქართველი ხალხის მისწრაფება ევროკავშირსა და NATO-ში გაწევრიანების შესახებ. პრეზიდენტმა, ასევე, განაცხადა, რომ ესკალაციას პუტინის გარდა არავინ ქმნის.

28 თებერვალს პრემიერმინისტრმა ირაკლი ღარიბაშვილმა განაცხადა, რომ რუსეთის მიმართ დასავლეთის დაწესებული სანქციები ეფექტური საშუალება არაა. მისი თქმით, რუსეთის სანქცირების შემთხვევაში, ფული, რომელიც საქართველოში შემოდის, "ხალხს მოაკლდება".

25 თებერვალს ღარიბაშვილმა განაცხადა, რომ საქართველო რუსეთს ფინანსურ და ეკონომიკურ სანქციებს არ დაუწესებს. მისი მტიცებით, ეს გადაწყვეტილება ქვეყნის ეროვნულ ინტერესებს ეფუძნება.

ამავე დღეს პრემიერმინისტრმა თქვა, რომ არავითარ საჭიროებას არ ხედავს უკრაინის საკითხზე პარლამენტში რიგგარეშე სხდომის მოწვევის და მას თავისი საქმე აქვს, პარლამენტსაც თავისი საქმე აქვს, ომი კი უკრაინაში მიმდინარეობს.