რუსული სააგენტო RIA-ს ცნობით, ამერიკელი პროკურორები რუსეთის მოქალაქისთვის 30 წლით პატიმრობის შეფარდებას ითხოვენ. მას კიბერთაღლითობაში ადანაშაულებენ.

რუსეთის დუმის დეპუტატის, ვალერი სელეზნიოვის შვილის, რომან სელეზნიოვის საქმეზე განაჩენს აშშ-ის ქალაქ სიეტლის სასამართლო 21 აპრილს გამოიტანს.

პროკურორები აღნიშნავენ, რომ რუსეთის მოქალაქისთვის წაყენებული ბრალდება, ხშირად, სამუდამო პატიმრობას ითვალისწინებს, ამიტომ 30 წელი საკმაოდ რბილი სასჯელია.

ბრალდების მხარე ითხოვს, რომ სასამართლომ ბრალდებულის აღიარებითი ჩვენება არ გაითვალისწინოს. პროკურორები ხაზს უსვამენ, რომ რუსეთის მოქალაქე სასამართლომდე გამოძიებასთან არ თანამშრომლობდა.

2016 წლის აგვისტოში რუსეთის მოქალაქეს ბრალი ხუთი მუხლით წაუყენეს: კიბერ თაღლითობა, დაცული კომპიუტერის განზრახ დაზიანება, დაცული კომპიუტერიდან ინფორმაციის მიღება, დაცული კომპიუტერების ქსელზე წვდომისათვის 15-ზე მეტი დაუშვებელ ხელსაწყოს შენახვა, პერსონალური ინფორმაციის მოპარვა დამამძიმებელ გარემოებაში.

პროკურატურის ცნობით, ბრალდებულის კომპიუტერში 1,7 მილიონი საკრედიტო ბარათის მოპარული ნომერი ინახებოდა.

აშშ-ის საიდუმლო სამსახურის აგენტებმა რუსეთის მოქალაქე მალდივის კუნძულებზე 2014 წელს დააკავეს. სელეზნიოვის დაცვის მხარემ, მისმა მამამ, რუსეთის სახელმწიფო დუმის დეპუტატმა ვალერი სელეზნიოვმა, ასევე რუსეთის საგარეო საქმეთა სამინისტრომ დაკავებას საერთაშორისო სამართლის ნორმების დარღვევა უწოდეს.